SAMATABA AWATAKA WAKURUGENZI WAKUU WA SHULE KUZINGATIA AGIZO LA RAIS

Tangakumekuchablog

Tanga,NAIBU Katibu Mkuu Ofisi ya Waziri Mkuu Tawala za Mikoa na Serikali za Mitaa, Zuberi Samataba, amewagiza wakurugenzi na walimu wakuu nchini  kusimamia agizo la Rais John Pombe  Magufuli la kukomesha michango shuleni.

Akifungua mkutano Mkuu wa mwaka wa Camfed na wadau wa elimu Tanga jana, Samataba alisema mwalimu mkuu yeyote ambaye atabainika kuchangisha na kusababisha kero kwa wananchi  achukuliwe  hatua kali za kisheria.

Alisema moja ya sababu zinazofanya malengo ya uandikishaji wananfunzi yasifikie kwa asilimia mia moja ni michango holela  wakati wa uandikishaji wanafunzi darasa la kwanza.

“Natoa wito kwa maofisa elimu na walimu wakuu nchini kusimamia agizo la Rais la kukomesha michango shuleni----yoyote ambaye atabainika hatua kali za kisheria atachukuliwa” alisema Samataba na kuongeza

“Familia masikini zinaogopa kuwapeleka watoto wao shuleni kisa michango ovyo ovyo----ninasema yoyote atakaebainika tutamshughulikia” alisema

Alisema wajibu wa mwalimu mkuu ni kusimamia uandikishaji wa watoto wote  wenye umri wa kwenda shule katika eneo lake kwa kushirikiana na viongozi wa mtaa na vijiji .

Aliwataka viongozi hao wa Serikali kushirikiana na wadau wa elimu kuwaandikisha watoto wenye umri wa kwenda shule lengo likiwa ni kutokomeza ujinga na wasiojua kusoma na kuandika.

Kwa upande wake Afisa Elimu Wilaya ya Kilolo Mkoani Iringa, Gloria Kang’oma, amekiri kuwa michango ilikuwa ikiwapa changamoto kutoka kwa wazazi hasa wa vipato vya chini.

Alisema kufutwa kwa michango hiyo itajenga mahusiano mazuri baina ya wazazi na walimu pamoja na kamati za shule ambapo baadhi ya wazazi walikuwa wakiwakosesha maxsomo watoto wao kwa kuhofia kuchangishwa.

“Kufutwa kwa michango shuleni ni furaha kwa walimu na wazazi kwani kesi na malalamiko kila siki ofisni zilikuwa haziishi----hii nadhani ni fursa kwa wazazi na walezi kuwabidiisha watoto wao kupenda shule na masomo” alisema Kang’oma

Alisema agizo hilo la Rais walimu wamelipkea kwa furaha kubwa na hivyo ni wajibu wao wa kusimamia kuhakikisha hakuna michango yoyote inayojitokeza shuleni.

   Mwisho

Naibu Katibu Mkuu Ofisi ya Waziri Mkuu Tawala za Mikoa na Serikali za Mitaa, Zuberi Samataba, akifungua kongamano la Mkutano Mkuu wa Comfed uliofanyika juzi Tanga.