HADITHI, MWANAMKE SEHEMU YA 39

SIMULIZI ZA FAKI A FAKI

MWANAMKE 39

ILIPOISHIA

Nilirudi nyumbani, nikapanga baadhi ya nguo zangu kwenye begi. Nilikuwa na akiba ya pesa nilizokuwa nimeziweka kwenye kabati. Nikazichukua.

Kwa vile kichwa kilikuwa kimenichafuka, nilimuachia funguo mwenzangu wa upande wa pili nikaenda kulala gesti.

Kitu ambacho kilinikera sana, niliota Zena amesimama kwenye jangwa akinicheka. Alikuwa akinicheka hadi anayumba kama mlevi.

Asubuhi kulipokucha nilitoka nikaenda kituo cha mabasi. Nilipanda basi la kuelekea Dar. Nilifika Dar saa sita mchana nikaenda kutafuta gesti. Nilipopata gesti niliacha begi langu na kwenda kwenye mkahawa uliokuwa karibu kupata chakula kwani sikuwa nimekula chochote tangu subuhi.

Baada ya kula chakula nilirudi pale gesti. Kulikuwa na mgeni mmoja wa kipemba aliyekuwa amepangisha chumba. Tulikutana ukumbini. Nikamsalimia na kumuuliza kama alikuwa anatoka Zanzibar.

“Natoka Mwanza, ndio niko safarini kuelekea Zanzibar” akaniambia.

“Unakwenda Unguja au Pemba?”

“Mimi naenda Pemba”

“Unatarajia kwenda lini?”

“Kesho asubuhi Mungu akipenda”

“Basi tutaondoka sote, nilikuwa na tatizo linalohusu huko Pemba na nitakueleza”

“Ni tatizo gani?”

“Hebu njoo huku chumbani kwangu nikueleze”

Yule mtu alikubali kuingia chumbani kwangu. Nikamueleza yale matatizo yangu.

SASA ENDELEA

“Sasa shida yangu ni kupata mganga ambaye ataliondoa hili tatizo” nikamwambia.

Mpemba alinyamaza kimya akafikiri kisha akaniambia.

“Yuko mama mmoja pale Pemba ni mganga anayetegemewa sana kwa matatizo ya majini. Kama yeye atashindwa ujue hutapata tena mganga ambaye atamuweza huyo jini wako”

“Ningekuomba unipeleke kwa huyo mwanamke”

“Nitakuelekeza na hutapotea”

“Lakini wewe pia si unakwenda huko huko”

“Ndio, mimi nakwenda Pemba lakini ninakokwenda ni kwingine na huyo mganga yuko kwingine. Yaani hata tukienda sote tutaachana bandarini”

“Si kitu, wewe nielekeze tu, nitafika”

Kwa vile mji wenyewe nilikuwa siujui, yule mtu alinichorea ramani ikianzia bandari ya Pemba hadi ulikokuwa mtaa huo. Akaniambia nyumba ya mganga huyo iko kwenye kona. Ni nyumba kubwa lakini ni ya kizamani sana na imepakwa chokaa nyeupe.

“Alama yake ni kuwa mlango wa mbele wa nyumba hiyo umechorwa picha ya nyota na mwezi” akaniambia.

“Nitapaelewa tu” nikamwambia.

Asubuhi ya siku iliyofuata tukasafiri sote kwenye boti. Tulipofika Pemba akanielekeza tena. Nikaenda mwenyewe katika huo mtaa.

Kwa vile nilikwenda kwa miguu ili nisipotee nilitembea sana

Mara kwa mara nilikuw a nawauliza watu niliokutana nao njiani kama wanamfahamu mganga huyo. Baadhi ya watu hao walikuwa wanamfahamu na wakanielekeza zaidi mtaa aliokuwa anaishi.

Baada ya mwendo mrefu nikafika katika mtaa huo, nikawa naitafuta ile nyumba. Baada ya kuhangaika sana nikaiona. Ilikuwa kwenye kona na ilipakwa chokaa nyeupe.

Alama kubwa iliyonipa moyo ni picha ya nyota na mwezi niliyoikuta kwenye mlango.

Kama alivyonieleza yule mtu niliyesafiri naye, nyumba hiyo ilikuwa ya kizamani sana na ilikuwa kwenye hatari ya kuanguka kwani ilikuwa ni nyumba iliyojengwa kwa mawe na udongo ingawa ilipauliwa kwa bati. Bati hilo lilikuwa limeota kutu na kuchakaa.

Nikaenda kwenye mlango na kubisha. Nilibisha mara mbili bila kupata jibu. Nilipobisha mara  ya tatu nikajibiwa.

“Karibu” Ilikuwa sauti ya mwanamke. Nilishaambiwa kuwa mgaga mwenyewe ni mwanamke.

Baada ya sekunde chache mlango ukafunguliwa. Ndani kulikuwa  kiza. Hata mtu aliyenifungulia mlango sikuweza kumuona vizuri.

“Karibu ndani” Sauti ya mwanamke ikaniambia.

Nikaingia. Kulikuwa na ukumbi mpana uliokuwa umetandikwa jamvi.

“Karibu ukae kwenye jamvi”

Nikakaa. Yule mwanamke naye akakaa kando yangu.

“Pole kwa safari, naona umetoka mbali” akaniambia huku akinitazama. Sasa pale ndipo nilipomuona vizuri. Kumbe alikuwa Zena!

Nilishituka sana nilipogundua kuwa mwanamke mwenyewe alikuwa Zena.

Nilishindwa kuelewa kwanini amekuwa Zena wakati niliambiwa kulikuwa na mwanamke ambaye ni mganga.

“Habari za huko?” Zena aliniuliza alipoona nimepigwa na butwaa.

Niligeza haraka uso wangu nisitazamane naye. Nikawa natazama chini.

“Nzuri” nikamjibu. Sauti yangu ilikuwa nzito ya mtu aliyetahayari.

“Mbona umekuja huku, una shida gani?” akaniuliza huku akinitazama kwa makini. Nilikuwa nimeinamisha uso wangu lakini nilikuwa namuona kwa pembeni mwa macho yangu.

Nilishindwa kujibu Swali lake kwa sababu sikujua ningemjibu nini. Nimjibu kuwa nimekwenda Pemba kufuata mganga na badala yake nakutana na yeye? Hapana.

“Nimekuja kutembea tu” nikamwambia  baada ya kushindwa kumueleza ukweli.

“Umekuja kutembea tu huku Pemba?” Zena akaniuliza kwa sauti iliyoonesha kuwa hakuyaamini maneno yangu.

“Ndio” nikamjibu.

“Sasa umeshatembea na kuuona mji?”

“Ndio”

“Umeuonaje?”

“Ni mji mzuri”

“Kumbe unatembea hadi huku Pemba?’

“Ni leo tu”

“Umepanga kurudi lini?”

“Nitarudi leo”

“Si ulale uondoke kesho?”

Nikatikisa kichwa.

“Nitaondoka leo leo”

“Nisubiri basi tuondoke sote”

Zena akainuka. Aliingia kwenye chumba kimojawapo ambacho mlango wake ulikuwa wazi. Nikamuona anavaa baibui. Akachukua mkoba wake na kutoka.

“Twendezetu” akaniambia kama vile tulikuja safari moja.

Nikainuka na kumfuata. Tulitoka kwenye ile nyumba tukashika njia  ya kuelekea bandarini.

Wakati wote nilikuwa nikijiuliza kwanini nilimkuta Zena pale nyumbani. Huyo mganga mwenyewe alikuwa wapi?

Ile ilikuwa ni miujiza ya ajabu ambayo sikuwahi kuiona katika maisha yangu.

Matarajio yangu ya kumpata mganga wa kuliondoa tatizo langu yalififia kabisa moyoni mwangu. Huyu jini alikuwa amenizingira kila pembe.

Tulipofika bandarini Zena alikata tikiti mbili za boti inayokwenda kasi. Boti hiyo ilikuwa inakwenda Dar. Siku ile hakukuwa na chombo chohote kinachokwenda Tanga.

Tulipojipakia kwenye boti nilikaa na Zena siti zilizokuwa zimepakana. Tulisubiri kwa muda wa saa nzima kabla ya safari kuanza.

Kweli kupambana na jini aina ya Zena ni kazi! Sasa alikuwa akinirudisha Dar. Niliamini kuwa alikuwa akijua kilichonipeleka Pemba ingawa hakuniambia. Kitu ambacho nilishindwa kuelewa ni jinsi nilivyomkuta yeye pale nyumbani kama vile ni kwake.

Wakati boti iko katikati ya safari nilimuona Zena amelala usingizi kabisa. Nikawa namtazama. Alikuwa na weupe uliochanganyika na wekundu. Uso wake ulikuwa na pozi la kiarabu ingawa alionekana kuchanganya damu ya Kiafrika. Sikujua kama majini nao wanakuwa machotara kama binaadamu.

Kwa uzuri alikuwa mzuri sana, sikuwahi kuona msichana mwenye mvuto wa sura na umbile kama yeye. Tatizo lake ni kwamba alikuwa jini tena jini mbaya mwenye vituko vilivyoshindikana.

Hadi pale nilikuwa nimesalimu amri. Nilishasema kuwa Zena sitamuweza tena na hakukuwa na mganga yeyote atakayemuweza.

Ghafla tuliona boti ikikata moto. Ikawa inasuasua juu ya bahari. Muda si muda ikapigwa na wimbi kubwa. Sote tulitikiswa. Hapo ndipo watu walipoanza kwenda mbio na kuifanya boti ilale upande mmoja.

Baadhi ya abiria wakaanza kujitosa baharini. Nikaona sasa hali ilikuwa mbaya. Nilijikuta nikimuamsha Zena bila kupenda. Zena akaamka.

“Nini. Mbona kuna hekaheka?” akaniuliza.

“Boti inazama” nikamwambia.

“Boti inazama?” akaniuliza kwa fadhaa.

Kabla sijamjibu, ule upande wa boti uliokuwa unazama ukazidi kulala.

“Duh ni kweli, twende tukaruke, tutakufa humu!” akaniambia huku akiinuka kwenye siti.

Tulikwenda kwenye mlango wa boti tukatoka. Watu walikuwa wakiendelea kuchupa baharini.

“Chupa!” Zena akaniambia.

Laiti angejua jinsi ambavyo sikuwa nikijua kuogelea asingeniambia chupa.

Upande wa pili wa boti nao ikaanza kuzama.

“Chupa, boti inazama!” akaniambia tena.

Sikuthubutu. Nilibaki kuitazama bahari.

“Amour unasubiri kufa humu ndani ya boti?” Zena akaniuliza kwa hasira.

Nikatikisa kichwa.

“Siwezi kuogelea, nikiruka ndio nimekwisha!”

“Mwanaume mzima unasema huwezi kuogelea, mimi mwanamke nisemeje?” akaniuliza.

Sikuwa na jibu. Nikaendelea kutikisa kichwa changu.

Sikujua ilikuwaje. Zena alinishika mkanda wa suruali yangu kwa nyuma kisha akanirusha baharini. Hadi leo nashindwa kujua alinirushaje.

Kabla ya kutumbukia baharini, nilijiambia ule ulikuwa ndio mwisho wangu.

Nilitanguliza mikono na kichwa, Nikazama chini kabisa.

DUH! MASIKINI KIJANA HUYU! JE HUU NDIO MWISHO WA AMOUR? TUSITISHE STORY HADI KESHO