YALIYONIKUTA TANGA SEHEMU (22)

YALIYONIKUTA TANGA (22)

 

ILIPOISHIA

 

Yule jini alipoondoka, yule mwanamke alituuliza tulichozungumza, tukamueleza.

 

“Sasa kesho mtakuja?” akatuuliza.

 

“Tutakuja kesho asubuhi” nikamjibu.

 

“Ngoja nikupe dawa yangu” akatuambia na kuinuka.

 

Aikwenda pembeni mwa chumba hicho. Alikuwa ameweka makorokoro yake ya kiganga. Akachukua pembe moja ya mnyama aliyokuwa ameifunga kitambaa cheusi. Ule upande uliokuwa na shina la ile pembe aliukung’uta kwenye kiganja chake, ukatoka unga mweusi.

 

Alinifungia unga huo kwenye kikaratasi.

 

“Usiku utatia dawa hii kwenye maji yako ya kuoga halafu utaoga” akaniambia.

 

Nikakichuku kile kikaratasi na kukitia mfukoni.

 

“Niitie yote au niibakishe?” nikamuuliza.

 

“Tia yote”

 

“Sawa”

 

SASA ENDELEA

 

Mganga huyo nilimpa shilingi elfu kumi tukaondoka. Tuliporudi nyumbani nilifanya kama nilivyoagizwa na mganga huyo. Usiku kabla ya kulala nilitia ile dawa kwenye ndoo ya maji ya kuoga kisha nikaenda kuoga.

 

Nilipotoka kuoga nilikaa barazani mwa nyumba yetu nikazungumza na ndugu na jamaa waliokuwa pale nyumbani hadi muda wa kulala ulipowadia.

 

Asubuhi kulipokucha baada ya kunywa chai nilichukua kile kisanduku nikakitia ndani ya saflet na kukibeba kama mzigo. Tukatoka na mama kuelekea kwa yule mganga.

 

Tulipofika, nilikitoa kile kisanduku na kumuonesha.

 

“Kisanduku chenyewe ndio hiki?” Mgnga akaniuliza.

 

“Ndio hicho” nikamjibu.

 

“Hebu kifungue” akaniambia.

 

Nikakifungua. Mganga alishangaa alipoona mapambo ya dhahabu yaliyokuwemo ndani.

 

“Hivi vyote vinaweza kufika shilingi ngapi?” akaniuliza.

 

Mara moja nikagundua kuwa mganga huyo alikuwa ameshapata tamaa ya zile dhahabu.

 

“Bei ya dhahabu kwa sasa imeshuka. Hizo zote zinaweza kufika shilingi laki mbili” nikamdanganya.

 

“Laki mbili tu zikutoe roho yako!”

 

“Kwanini?”

 

“Naona ni pesa ndogo sana”

 

“Hata mimi nimeona ni ujinga kutolewa roho yangu kwa pesa hizo ndio maana tumekuja kwako uwazuie hao majini wasinifuate”

 

Mganga huyo akanifanyia uganga wake kisha akatuma mtu aende akachukue mchanga wa kaburini. Alitaka aletewe kiasi kidogo cha mchanga huo. Mtu aliyemtuma alimletea mchanga huo alioufunga kwenye kitambaa. Akamuagiza tena akamletee kinyesi cha nguruwe.

 

Kinyesi hicho kilipatikana katika nyumba ya jirani ambako walikuwa wanafuga nguruwe.

 

“Sasa nenda kaninunulie bangi moja” Mganga akamuagiza tena yule mtu.

 

Kutokana na kazi yangu ya upolisi, “neno” bangi ninapolisikia huwa nasisimkwa na mwili na akili yangu inakwenda kwenye sheria. Lakini muda ule nilitulia kimya kama maji ya mtungi kama vile bangi ilikuwa kitu cha kawaida kwangu.

 

Hata hivyo nilikuwa nikijiuliza bangi ilikuwa inatumikaje katika uganga wakati kilikuwa kilevi kisichokubalika? Sikupata jibu la swali hilo.

 

Yule mtu aliyetumwa bangi hakuchelewa sana akarudi akiwa na bangi yake mkononi. Nikahisi kwamba bangi ilikuwa ikiuzwa sana pale kijijini.

 

Nikakumbuka zamani nilishuhudia kesi ya mvuta bangi mmoja aliyedai kuwa akivuta bangi huwa anapata nguvu ya kulima. Nikajiambia  huenda zilitumika pale kijijini kwa sababu hiyo.

 

Ile bangi ilipoletwa ilichanganywa na vile vitu vingine vilivyoletwa kwanza, yaani ule mchanga wa kaburini na kile kinyesi cha nguruwe.

 

Baada ya vitu hivyo kuchanganywa vilitiwa kwenye chungu na kuwekwa kwenye jiko. Baada ya sekunde chache vilianza kuungua na kutoa moshi. Yule mganga alikuwa ameshika mwiko akivigeuza huku na huku.

 

Vilikuwa vikitoa harufu mbaya iliyokuwa inaumiza kichwa. Mama yangu alipiga chafya mara mbili.

 

“Kama unasikia vibaya toka nje” Mganga huyo akamwambia mama.

 

Mama akatoka nje. Mganga aliendelea kuvichoma vile vitu mpaka vikaungua na kuwa vyeusi. Aliepua kile chungu na kukiweka kando ya jiko.

 

ITAENDELEAKESHO, Usikose kufuatilia mfululizo wa uhondo huu nini kitatokea hapo kesho kupitia blog yako hii makini www.tangakumekucha.blogspot.com