SOMA HABARI KUU ZILIZOPEWA UZITO MAGZETI YA LEO, TZ

Uchambuzi huu wa magazeti unaletwa kwenu kwa hisani kubwa ya kituo cha Elimu cha Candle Education Centre. Kituo kiko na walimu waliobobea. Wapo Tanga mkabala na banki ya CRDB simu 0715 772746

JAMBO LEO

Mwalimu wa shule ya Sekondari Kibasila, Gaudensia Albert aliyekuwa akihifadhi kinyesi ndani kwak kwa miaka miwili amepelekwa Hospitali ya Muhimbili baada ya daktari wa Hospitali ya Temeke kubaini ana matatizo ya akili.

Mwalimu Mkuu Msaidizi wa Shule hiyo, Kyando amesema baada ya kugundulika kwa tukio hilo walimpeleka Hospitali ya Temeke kwa kuangalia afya yake ambapo daktari akasema ana tatizo la akili, wakamuhamishia Muhimbili.

Baada ya kufikishwa Muhimbili madaktari walimpatia dawa ambazo anatumia mpaka sasa pamoja na ushauri.

“Sisi bado tunamhitaji kutokana na tatizo la uhaba wa walimu wa sayansi ulioko nchini”—alisema Mwalimu Kyando na kuongeza kuwa mbali na tatizo la kukutwa na kinyesi bado mwalimu huyo alikuwa anafundisha vizuri.

MWANANCHI

Licha ya kampeni kubwa ya kupambana na kuzuia usafirishaji, uuzaji na matumizi ya dawa za kulevya Tanzania bado Watanzania wameendelea kufanya biashara hiyo, katika kipindi cha siku 30 mabinti 12 wamekamatwa wakisafirisha dawa hizo ndani na nje ya nchi.

Taarifa zilizolifikia gazeti la MWANANCHI na kuthibitishwa na Kamishna wa Kikosi cha Kupambana na Dawa za Kulevya, Godfrey Nzowa zinaonyesha kuwa idadi kubwa ya Watanzania waliokamatwa katika kipindi hicho ni mabinti wenye umri mdogo ambapo mabinti wanane wamekamatwa Uwanja wa Ndege wa Hong Kong na wanne katika Uwanja wa Ndege wa Kimataifa wa Dar es Salaam.

Kamishna Nzowa alisema ingawa vyombo vya habari na wafungwa walioko Hong Kong wamejaribu kuwashauri Watanzania wasifanye biashara hiyo, bado wamekuwa na ‘shingo ngumu.’

Wakati huo huo Padri John Wotherspon aliyekuwa nchini kwa ajili ya kampeni ya kuwazuia vijana wa Kitanzania kusafirisha dawa za kulevya amesema wanawake wanane wa Kitanzania pia wamekamatwa katika uwanja wa ndege wa Hong Kong katika kipindi hicho hicho.

MWANANCHI

Rais Jakaya Kikwete amedokeza kuwa matukio ya watu wasiojulikana kuvamia vituo vya polisi, kupora silaha na kuwashambulia askari ‘yana sifa za ujambazi na mwelekeo wa kigaidi’ huku akisema hali ya usalama nchini ni nzuri kutokana na matukio hayo pamoja na mengine ya mauaji ya albino.

“Matukio haya yana sura mbili. Yana sura ya ujambazi, lakini pia baadhi yake yana dalili za ugaidi. Vyombo vyetu vya usalama vinaendelea kufanya kazi yake ya uchambuzi wa kila tukio na kulipa nafasi yake stahiki,”– Rais Kikwete.

Rais Kikwete alitoa orodha ya matukio ya kuvamiwa vituo vya polisi ambavyo ni pamoja na vya Newala mkoa wa Mtwara, Ikwiriri Wilaya ya Rufiji, Kimanzichana vilivyovamiwa ndani ya kipindi cha miezi 12 na jumla ya bunduki 38 ziliporwa na askari polisi saba kuuawa.

Rais Kikwete ametoa pongezi kwa polisi na Jeshi la Ulinzi la Wananchi (JWTZ) kwa kazi nzuri ya kupambana na uhalifu nchini.

MWANANCHI

Shirika la Umeme Tanzania (Tanesco), limesema linaendelea na kazi ya kurekebisha hitilafu kwenye mfumo wa LUKU kwa njia ya mitandao ya simu ili kuwalipa ‘units’ wateja wake waliokatwa pesa zao kabla ya kupata huduma hiyo ambapo kwa zaidi ya siku mbili huduma hiyo imekuwa haipatikani kwa njia ya simu.

Akizungumzia suala hilo, Meneja Uhusiano wa Tanesco, Adrian Severin alisema jambo la kwanza ni kuwapa ‘units’ wateja ambao tayari wameshalipia, baadaye wateja wengine watanunua umeme kupitia simu zao.

“Kuna hitilafu ya kiufundi imetokea kwenye mfumo wa Luku, tunatarajia usiku wa leo (jana) kazi itakamilika. Baada ya hapo tutatoa huduma kwa wote waliokatwa pesa zao bila kupata huduma,” — Adrian Severin.

Msemaji huyo wa Tanesco alisema huduma ya Luku bado inapatikana kupitia Maxi Malipo na Benki za CRDB, NMB.

Alisisitiza watu kutumia miamala ya kibenki kulipia umeme ili kupunguza foleni kwenye mashine za Maxi Malipo.

Mkazi wa Tabata Segerea, George Ismail alisema; “Jana nimekaa kibandani saa matatu nikisubiri kununua umeme. Sijazoea hali hii, ninajua kuna shida fulani, lakini sijui tatizo ni nini, sijapata taarifa zozote kutoka Tanesco,” alisema Ismail na kuongeza kuwa alijaribu kwa njia ya simu pia huduma hiyo ilishindikana.

Hata hivyo, jana Tanesco lilitoa taarifa kupitia gazeti hili juu ya tatizo la kiufundi lililotokea kuanzia Februari 28 na kubainisha kuwa mafundi walikuwa wakiendelea kulifanyia kazi tatizo hilo.

Hii siyo mara ya kwanza huduma ya Luku kuleta adha kwa wananchi, Januari mwaka huu kulikuwa na tatizo la upatikanaji wa Luku katika maeneo mbalimbali Dar es Salaam.

MWANANCHI

Waziri wa Ujenzi, John Magufuli ameupongeza Wakala wa Barabara Tanzania (TANROADS) kwa kuwachukulia hatua watendaji wa Kampuni ya Dott Services kwa kosa la kuchelewesha ujenzi wa barabara ya Mkumbara hadi Same yenye urefu wa kilomita 96.

Kampuni hiyo yenye makao yake makuu Uganda, imeshindwa kukamilisha ujenzi wa barabara hiyo unaogharimu Sh103.8 bilioni huku kampuni ya Strabag iliyochukua ukandarasi wa kujenga barabara kama hiyo ya Korogwe hadi Mkumbara, ikimaliza kazi yake Desemba 3 mwaka jana kama ilivyosaini mkataba.

Dk Magufuli alitoa pongezi hizo wakati akikagua barabara hizo baada ya Mtendaji Mkuu wa Tanroad, Patrick Mfugale kuelezea kwamba alilazimika kuwafukuza baadhi ya mameneja wa Kampuni ya Dott Services wanaodaiwa kusababisha isikamilike kwa wakati.

Akizungumza baada ya kupokea taarifa hiyo, Dk Magufuli alielezea kutoridhishwa kwake na hatua ya Kampuni ya Dott Services ya kuchelewesha ujenzi huo na kuitaka iharakishe ili Rais Kikwete aweze kuifungua kabla hajaondoka madarakani.

Aliipongeza Strabag kwa kukamilisha ujenzi kwa wakati na kuitaka kufanyia marekebisho madogo katika maeneo yaliyoonyesha dalili ya lami kuvimba.

NIPASHE

Rais Kikwete jana ameongoza umati wa watu kuaga mwili wa kada wa Chama Cha Mapinduzi (CCM) na Mbunge wa Jimbo la Mbinga Magharibi, Kapteni John Komba ambapo mwili huo pia ulipokelewa na kuagwa na umati kikubwa wa wakazi wa Manispaa ya Songea katika uwanja wa ndege na wa mpira wa  Maji Maji.

Shughuli za kuuaga mwili huo zilifanyika katika viwanja vya Karimjee na kuhudhuriwa na umati wa wananchi wakiwamo viongozi wa serikali, mawaziri, wabunge,  vyama vya siasa na asasi mbalimbali za kiraia.

Spika wa Bunge, Anne Makinda ni miongoni mwa viongozi waliobubujikwa machozi hasa wakati ukiimbwa wimbo maalum wa maombolezo ambao uliwahi kuimbwa na Komba mwenyewe enzi za uhai wake wakati wa msiba wa Baba wa Taifa, hayati Mwalimu Julius Nyerere, mwaka 1999,  lakini ukiwa umeingizwa vibwagizo vingine vilivyokuwa vikimtaja mbunge huyo.

Wengine walioshindwa kuzuia hisia zao ni Katibu wa Itikadi na Uenezi wa CCM, Nape Nnauye na Katibu Mkuu wa zamani wa chama hicho, Yusuph Makamba.

Spika Makinda alisema Komba amezimika kama kibatari huku akitunga nyimbo na akijiandaa kwenda Ethiopia na wabunge wenzake wa Kamati ya Bunge ya Maendeleo ya Jamii.

“Alifariki dunia akiandika nyimbo…sisi sote ni wa Mungu, tutaondoka..huko kuna raha, inategemeana na mtu alivyoishi. Alikuwa ni mtu wa kucheka na yeyote na yeye amekwenda kupeleka hesabu za kazi alizozifanya,” alisema Makinda na kuongeza.

“Alikuwa kipenzi cha wengi na sisi CCM tunaamini Mungu atatupatia Komba mwingine. Naomba tuache kusema vibaya juu yake….nafikiri Komba angeambiwa kwamba baada ya robo saa utakufa, jambo la kwanza ambalo angeeleza angeomba msamaha.”—Spika Makinda.

NIPASHE

Mbunge William Ngeleja leo amepandishwa katika Baraza la Maadili ya viongozi wa umma kuhojiwa juu ya tuhuma zinazomkabili za kunufaika na mgawo Sh. milioni 40 kutoka katika akaunti ya Tegeta Escrow.

Baraza hilo jana liliahirisha shughuli zake za kumhoji Mkurugenzi wa Sheria, Wizara ya Ardhi, Nyumba na Maendeleo ya Makazi, Rugonzibwa Mujunangoma  kutokana na shughuli ya kuaga mwili wa aliyekuwa Mbunge wa Mbinga Magharibi, Kapteni Komba katika viwanja vya Karimjee, eneo ambalo Baraza hilo linafanyia mahojiano hayo.

Wakati  Baraza likimhoji  Ngeleja leo, tayari limekwisha wahoji Wabunge Andrew Chenge na Prof. Anna Tibaijuka ambapo Baraza hilo litaendelea na shauri la Prof. Tibaijuka  Machi 13, mwaka huu baada ya Wakili wake Dk. Rugemaleza Nshala, kuomba udhuru wa kwenda Marekani kwa siku 10.

Mwenyekiti wa Baraza hilo, Jaji mstaafu Hamisi Msumi, alisema shauri hilo litaamuliwa kama liwe la uamuzi wa ndani au hadharani.

Kwa upande wa Chenge, tayari alikwishakata rufaa  katika Mahakama Kuu kuzuia shauri lake lisijadiliwe.

Nitaendelea kukupatia kila stori inayonifikia , niko tayari kukutumia wakati wowote kupitia www.tangakumekucha.blogspot.com