WAKAZI VIJIJINI WALITAKA SHIRIKA LA UMEME TANZANIA TANESCO, KUTOA ELIMU YA MATUMIZI YA UMEME VIJIJINI

Tangakumekuchablog

Korogwe, WAKAZI wa vijiji vya Kwamsisi, Kwakombo na Maili kumi Wilayani Korogwe Mkoani Tanga, wamelitaka Shirika la umeme Tanzania (Tanesco) kutoa elimu ya matumizi ya umeme ili kuepusha hatari kabla ya kuanza kuwafungia mita majumbani.

 Wakizungumza kwa vyakati tofauti wakati wa utoaji elimu  mradi wa usambazaji umeme vijijini (Rea) uliofanywa na  wafanyakazi wa Shirika la Umeme Tanzania (Tanesco) Mkoa wa Tanga, wakazi wengi wamedai hawana elimu ya matumizi ya umeme.

Wamelitaka shirika hilo kuwahamasisha wateja wake kujenga nyumba bora  na imara ili kuwa rahisi kuunganishiwa umeme jambo ambalo litapunguza idadi ya nyumba za nyasi na makuti.

Walisema mradi huo wa usambazaji  umeme  vijijini  utakuwa msaada mkubwa kwa shughuli za  maendeleo hasa kwa wakulima wa matunda na mbogamboga jambo ambalo litawakomboa na  kuongeza kipato.

“Mradi huu wa usambazaji umeme vijijini kwa kweli ni mapinduzi makubwa si kwa viburudisho tu majumbani bali hata sisi wakulima tutaweza kuhifadhi matunda yetu na kuepuka vitisho vya kutuozea majumbani” alisema Hamis Shomari

“Mara nyingi kama mchicha na matembele usipouza kwa wakati unajikutaka unauza majani makavu ambayo hata mnyama hawezi kula tena kwani itakuwa imekauka----umeme vijijini utakomesha pia biashara ya ulanguzi” alisema

Shomari amelitaka shirika hilo kuwapunguzia gharama za matumizi na kuwa tofauti na watu wanaoishi mjini kwani kufanya hivyo watashindwa kulipa Ankara za matumiz yao.

Alisema ni lazima kuwepo  na utofauti ya Ankara za watu wa vijijini na wa mjini kwani wengi hawana vipato vya kuwawezesha kulipa sawa na watu wanaokaa mjini ambao wako na nyenzo nyingi za kuwaingizia vipato na kumudu gharama za maisha.

Akizungumza wakati wa uhamasishaji wa wananchi kuupokea mradi huo wa umeme vijijini, Afisa habari na huduma kwa wateja, Monica Mabada, amewataka wananchi kuilinda miundombinu ya umeme na kuwafichua mafundi vishoka.

Alisema ujio wa mradi wa usambazaji umeme vijijini kunaweza kujitokeza wafanyakazi feki wa shirika la umeme Tanesco na hivyo kuwataka kuwafichua na kuepuka njama za kulipa Ankara  mikononi.

Alisema zipo taarifa za kuwepo kwa vishoka wanaopita majumbani kuwadai wananchi kutaka kuwafungia umeme kwa gharama za juu ikiwa lengo ni kujipatia pesa kwa udanganyifu na hivyo kuwakumbusha taratibu zote zinafanyika ofisi za shirika hilo.

“Ndugu zangu wananchi wa Kwamsisi nawapa tahadhari na mafundi vishoka kwani ujio wa umeme vijijini kunaweza kuzuka matapeli na kuwahadaa ili kujipatia pesa kwa udanganyifu” alisema Mabada

“Taratibu zote zihusuzo umeme zinafanyika ofisi za shirika la umeme Mkoani au Wilayani----epukeni kulanguliwa kwani taarifa tulizonazo ni kuwa wameanza kujingiza maeneo yenu” alisema

Aliwataka kuitumia fursa ya ujio wa umeme katika maeneo yao kwa kuanzisha fursa mbalimbali za kuingiza kipato ikiwemo viwanda vidogovidogo vya kusindika matunda na ufundi mhuzi.

                                                      Mwisho