MHIFADHI MAPANGO YA AMBONI TANGA ALIA NA VYOMBO VYA HABARI

Tangakumekuchablog

Tanga, BIASHARA ya Utalii Mapango ya Amboni Tanga imeathirika baada ya tukio la mapigano ya kurushiana risasi baina ya majambazi na polisi lililotokea kijiji cha Mleni kilometa tano kutoka katika vivutio hivyo.

Akizungumza na Tangakumekuchablog leo, Mhifadhi Msaidizi Mapango ya Amboni,Tabu Mtelekezo, alisema kwa sasa hakuna wageni wanaofika eneo hilo baada ya vyombo vya habari kupotosha eneo halisi lilipotokea mapigano baina ya majambazi na polisi.

Alisema toka tukio hilo lilipotokea wamepata wageni 16 ambapo ni idadi ndogo sana ikilinganishwa kabla ya tukio ambapo walikuwa wakipokea wageni 300 wa ndani na nje ya nchi.

“Hivi unavyoona hapa hakuna mgeni yoyote ambaye anakuja hapa na yumejikalia tu----hii ni kutokana na baadhi ya vyombo vya habari kupotosha umma ya tukio lilipotokea alisema Mtelekezo na kuongeza

“Tunaviomba vyombo vya habari kuandika habari sahihi ya eneo la mapigano ya majambazi na polisi kwani ni zaidi ya kilometa tano na sio hapa---kwa kweli limetuathiri sana na hakuna mtu anaekuja hapa” alisema

Kwa upande wa wafanyabiashara eneo la mapangoni na vijiji vya jirani na vivutio hivyo wamelalamika kukosa wateja kutoka na biashara zao kutegemea wageni wanaotembelea eneo la vivutio.

Mmoja wa wafanyabiashara mwenye duka, Rojas Mkufya, alisema kabla ya vyombo vya habari kupotosha umma wa tukio has lilipotokea walikuwa wakiuza zaidi ya shilingi lakini mbili na kwa sasa wako wastani wa shilingi elfu hamsini.

Alisema taarifa hizo zimewapotosha wageni ambao walikuwa wateja wakubwa na kuweza kununua mahitaji mbalimbali yakiwemo vinywaji na vyakula na kwa sasa wamekuwa wakiwategemea wateja wa mtaani peke yake.

“Maduka yetu yamefifia kama unavyoona hapa hakuna hata mteja mmoja jambo ambalo sio kawaida---tulikuwa tunauza hadi shilingi laki mbili kwa maduka haya rejareja ni mauzo makubwa sana” alisema Roja na kuongeza

“Mapango ya amboni yamekuwa yakitembelea na wageni wengi na hii ndio njia yao na wamekuwa wakisimama wakinunua vinywaji na viburudisho vyengine  kwa kweli  taarifa za upotoshaji wa vyombo vya habari vimetuathiri sana” alisema Roja

Kwa upande wake Chonge Maumba, amesema upotoshaji huo umewaathiri hadi wachimba kokoto na mawe ambao pia walikuwa wateja wakubwa katika maduka yao.

Alisema wachimbaji hao ambao idadi yao ni kubwa walikuwa wakiwaingizia mapato makubwa kwa siku na hivyo kuvitaka vyombo  vya usalama kulimaliza suala hilo eneo la Mleni na wageni kuweza kufanya shughuli zao za kitalii kama kawaida.

Kwa upande wa mama lishe, Zahra Ali amesema hakuna mteja anaefika kunywa chai wala chakula zaidi ya wenyeji na hivyo kupatwa na kigugumizi cha kufunga biashara au kuendelea.

Alisema awali walikuwa wakipika mchele kilo tano na chakula kumalika na kwa sasa wamekuwa wakipika kilo mbili ambazo hakimaliziki kutoka na wateja kuwa wachache.

“ Hapa katika genge langu hakuna mteja zaidi ya wenyeji ambao wanakuja kunywa chai na chakula kidogo jambo ambalo sio mazoea---hii ni kutokana na wageni kukacha kuja Mapangoni baada ya taarifa kupotoshwa” alisema Zahra

Alisema hali hiyo ambayo hawajui inaweza kuchukua muda gani huku familia zao zikitegemea wageni na wafanyakazi wa kuchimba kokoto na mawe wanaotumilia njia hiyo kukatisha.

                                                           Mwisho