WAKAZI WA MAGAONI A KATA YA MABAWA WAMLALAMIKIA MKANDARASI

 Tangakumekuchablog

Tanga, WAKAZI wa mtaa wa Magaoni A kata ya Mabawa Tanga, wameitaka halmashauri ya jiji la Tanga kumuamuru mkandarasi wa ujenzi zahanati ya Magaoni kwa kulifunika shimo la choo ili kuepusha maafa kwa watoto na kuongezeka kwa mazalia ya mbu.

Wakizungumza na tangakumekuchablog eneo la tukio kufuatia kutumbukia mtoto katika shimo la choo la Zahanati ya Magaoni jana, wakazi hao walisema shimo hilo lipatalo mita kumi  yapata mwaka mmoja toka lichimbwe na mkandarasi kutokomea kusikojulikana.

Walisema shimo hilo limekuwa kero baada ya kuzalisha mazalia ya mbu  na kusababisha wakazi wa mtaa huo kuugua homa zisizoisha na hivyo kumtaka mkurugenzi wa jiji kumuamuru mkandarasi kumalizia kazi yake kwa kulifukia.

“Toka zahanati hii imalizike kujengwa haina faida yoyote kwetu kwani limebakia kama gofu----haina umeme wala miundombinu ya maji na zaidi mkandarasi amechimba shimo na kujaa maji na kuzalisha mazalia ya mbu” alisema Zubeda Said

“Leo asubuhi kuna mtoto ametumbukia katika shimo eti anavua kambare---Mungu amemnusuru tu baada ya majirani kusikia kelele zilizokuwa zikisikika katika shimo na kuokolewa na hivi sasa yuko hospitali amelazwa Bombo” alisema Zubeda

Kwa upande wake mama mzazi wa mtoto alietumbukia  katika shimo, Halima Athumani, alisema shimo hilo limekuwa kero na nyakati za usiku sauti za vyura na mbu hupiga kelele na kuwa kero.

Alisema mtaa huo haukuwa na mbu wengi kama ilivyo sasa na hivyo kuwa na hofu ya kuzuka kwa magonjwa ya miripuko yakiwemo ya malaria na matumbo na kuwataka viongozi wenye dhamana kulipatia ufumbuzi.

“Nyakati za usiku hatulali kwa sauti za vyura na mbu wengi na kuwa kero----ifikapo usiku huwa tunaingiwa na hofu na kutokuwa na raha jambo ambalo tunajilazimisha kulala mapema japo hatuko tayari kufanya hivyo” alisema Halima

Akizungumzia kero hiyo, Mwenyekiti wa mtaa, Ramadhani Malodi, alisema malalamiko hayo ya wananchi ameshayafikisha katika ngazi husika na kushangazwa hadi muda huo hakuna utekelezaji wowote.

Alisema pia taarifa ya kutumbukia mtoto katika shimo la choo la kituo cha zahanati amelifikisha na kuarifu kuwa ni vyema kufukiwa au kumaliziwa kwa kusakafiwa ili kuondosha kitisho cha maafa kwa watoto.

“Kero zote za wananchi  zilizokuja katika ofisi yangu nimezifikisha kwa wahusika---mimi hapa nimewekwa na wananchi na niwajibu wangu kila nifikishiwalo nalifikisha kwa wahusika” alisema Malodi

Akizungumzia kuhusu wananchi kuweka mazingira ya usafi, Mwenyekiti huyo aliwataka kila mmoja kuhakikisha eneo lake linakuwa katika usafi muda wote wa kazi ili kuepusha magonjwa ya miripuko kuelekea kuipindi cha mvua za masika.

Alisema ameweka utaratibu wa kila kaya kuhakikisha eneo lake linakuwa katika usafi na kuwa na chombo maalumu cha kuhifadhia pamoja na kuisafisha mifereji ya maji taka.

                                                        Mwisho