WAZIRI ANGELLA KAIRUKI ANAAMINI TANGA WATUMISHI HEWA WAKO WENGI, AOMBA WAFICHULIWE

Tangakumekuchablog

Tanga, WAZIRI wa Nchi, Ofisi ya Rais Utumishi wa Umma na Utawala Bora, Angella Kairuki, ameliagiza Jeshi la Polisi na Vyombo vya Usalama kuwafichua watumishi hewa na wenye vyeti feki.

Akizungumza na wakuu wa Idara na watumishi mbalimbali wa Serikali na Taasisi za Umma jana, Kairuki alisema mbali ya kupewa taarifa ya kuwepo kwa watumishi hewa Tanga 198 amedai anaamini wapo wengi.

Alisema ili kuweza kuwafichua ameliomba jeshi la polisi na vyombo vya usalama kusaidia ili kuwakamata na kuwapeleka katika vyombo vya sheria kabla ya wao kujinasua.

“Naliomba jeshi la polisi na vyombo vya usalama kusaidia kuwafichua watumishi hewa na wenye vyeti feki, tunaamini tutawakamata na kuwapeleka mahakamani  kabla ya wao kujinasua” alisema Kairuki na kuongeza

“Tunatambua kuwa kuna watumishi wenye dhamana ambao hawana sifa ila kwa kuwa na vyeti vyao feki wamejipatia vyeo ambavyo wanashindwa kuongoza” alisema

Akizungumzia kuhusu maadili, Kairuki aliwataka watumishi hao kuzingatia maadili ya kazi na kutunza siri za Serikali na kusema kuwa yoyote ambaye atashindwa ni vyema kujiengua.

Alisema Wizara yake itahakikisha kila mtumishi na mkuu wa Idara anaitumia vyema nafasi yake kwa kuwahudumia wananchi kwa usawa bila ubaguzi ili kuondosha manung’uniko kutoka kwa wananchi.

Alisema kuna baadhi ya Idara zimekuwa zikilalamikiwa kwa kushindwa kuleta uadilifu na usawa kwa utoaji wa huduma hivyo kuagiza tabia hiyo kukomeshwa mara moja.

Alisema mkuu yoyote  wa Idara ambaye atashindwa kuitumia nafasi yake  kwa uadilifu ajiengue mwenyewe kabla ya fagio kumpitia kwa madai kuwa Serikali ya awamu ya tano haitakiwa watumishi kufanya kazi kwa mazoea.

Aliwataka wananchi kutoa taarifa za malalamiko katika Idara za Serikali na za Umma ili kukomesha ukiritimba na manyanyaso na  utoaji wa huduma kwa upendeleo

                                                Mwisho

Waziri wa Nchi Ofisi ya Rais Utumishi wa Umma na Utawala Bora, Angela Kairuki, akizungumza na wakuu wa Idara na watumishi wa mbalimbali wa Umma, ukumbi wa mikutano jengo la mkuu wa Mkoa wa Tanga  jana.

 Wakuu wa Idara na Watumishi mbalimbali wa Umma,wakimsikiliza Waziri wa Nchi, Ofisi ya Rais Utumishi na Utawala Bora, Angela Kairuki, wakati wa kikao na wakuu wa Idara na watumishi mbalimbali wa Serikali na Umma wa Mkoa wa Tanga jana,  kikao kilichofanyika jana ukumbi wa jengo la Mkuu wa Mkoa