POLISI YAMNASA MTUHUMIWA WA UJAMBAZI MKATA, HANDENI TANGA

Tangakumekuchablog

Tanga, POLISI Mkoani Tanga  inawashikilia  wahamiaji haramu sita wenye asili ya Ethopia  wakiwa wamefichwa katika msitu wa Kichalikani Wilayani Mkinga na baadhi yao wakiwa wamechoka kwa njaa.

Akizungumza na waandishi wa habari jana ofisini kwake , Kamanda wa polisi Mkoani Tanga, Zuberi Mombeji, alisema tukio hilo lilitokea juzi saa 11 alfajiri  wakati wa doria baada ya kupata taarifa za kufichwa kwa watu hao.

Aliwataja wahamiaji hao kuwa ni Warikine Hizza (30), Namamba Amita (36), Tamery Ashored (29), Daudi Manemeo (25) Luosed Kedaw (28) na Tahmed Afford (29) na kusema kuwa wote wanashikiliwa kituo kikuu cha polisi Chumbageni.

“Wakati wa operesheni zetu za kawaida tulipata taarifa za kufichwa kwa wahamiaji haramu na ilichukua maasa ishirini na nne hadi kuwakamata kutokana na mvua kubwa na wao kuhamishwa hamishwa” alisema Mombeji na kuongeza

“Tuliwagundua wakiwa wamefichwa katika pango la mbuyu mnene huku wakiwa wamechoka kwa njaa---inavyonekana wenyeji wao walikuwa kama wamewatekeleza” alisema

Kamanda Mombeji alisema watuhumiwa hao wanahojiwa na mara baada ya uchunguzi itawafikisha mahakamani kujibu tuhuma za kuingia nchini bila kibali na kutoa wito kwa wananchi kushirikiana na polisi kukomesha uingizaji wa wahamiaji haramu na bidhaa za magendo.

Katika tukio jengine, polisi Wilayani Handeni inamshikilia, Bashiru Hamis (44)  mkazi wa Ilala Dar es Salaam kwa tuhuma za kupatikana na bastola moja yenye risasi 9 wakati wakijiandaa kufanya tukio la kihalifu.

Tukio hilo lilitokea juzi saa 3 usiku Mkata Wilayani Handeni wakati polisi ilipopata taarifa kutoka kwa raia wema kuwepo kwa watu hao ambao walikuwa wameweka kambi katika nyumba ya kulala wageni.

“Tulipata taarifa kutoka kwa raia wema kuwepo kwa watu wawili ambao nyendo zao hazikuwa za kiungwana na walikuwa wanatoka nyakati za usiku na kurejea alfajiri kila siku” alisema Mombeji

Kamanda Mombeji alisema hali hiyo iliwalazimu wananchi kutoa taarifa kituo cha polisi na ndipo ilipowekwa mitego na kunaswa Hamis wakati mwenzake aliwahi kutoroka na hivyo jeshi la polisi linaendelea kumtafuta.

                                              Mwisho

 Kamanda wa Polisi Mkoa wa Tanga, Zuberi Mombeji, akiwaonyesha waandishi wa habari bastola moja na risasi tisa iliyokamatwa katika msako wa pilisi Mkata Wilayani Handeni iliyosadikiwa kuwa ilikuwa ikitumika katika matukio ya kijambazi.