SERIKALI NA VIONGOZI WA DINI WATAKIWA KUSHIRIKIANA KUTOKOMEZA VITISHO VYA KIUSALAMA

KUMEKUCHABLOG

DAR ES SALAAM ,MTANDAO wa kutetea haki za binadamu Tanzania (THRDC) imeyataka mashirika ya Serikali na yasiyo ya Serikali pamoja na viongozi wa dini kuunda mtandao utakaowezesha kutokomeza vitendo vya kikatili na ukiukaji wa haki za binadamu nchini.

Akifungua mafunzo ya siku tatu kwa wanachama na Asasi zisizo za Serikali, Mkurugenzi wa Mtandao wa Tanzania Human Rights Deffenders Coalition (THRSC),Onesmo Olengurumwa, alisema viongozi wa dini na Asasi ziko na nafasi kubwa katika kutokomeza ukiukwaji wa haki za binadamu Tanzania.

Alisema watetezi wa haki za binadamu wako katika vitisho kutokana na ujasiri wao wa kufichua na kuzungumza hadharani matendo ya baadhi ya watu wanaoleta vitisho na wanaovunja haki za bianadamu.

“Mafunzo haya tumeyaleta kwenu ninyi kama watetezi wa haki za binadamu kwa kuwafunda usalama na kutathmini athari kwa watetezi wa haki za binadamu----hii ni kutokana na vitisho muvipatavyo munaporiti” alisema na kuongeza

“Kuelekea uchaguzi mkuu mwaka huu tunatambua mengi huibuka lakini tunaamini hayatatokea na tunaomba yasitokee na ndio maana tumewaiteni hapa kuwapa mbinu za usalama na kuwa watetezi wetu wakubwa katika maeneo yenu”alisema

Akizungumzia waandishi wa habari kipindi cha kampeni na uchaguzi mkuu mwaka huu, Mkurugenzi huyo aliwataka kuwa makini wakati wanaporipoti taarifa za wagombea na kuepuka kutumiliwa kwa maslahi ya mtu mmoja.

Alisema vipindi hivyo huibuka mengi kwa waandishi wa habari na kupokea vitisho kutokana na kusema kwao ukweli na hivyo kuwataka kutumia weledi wao wa taaluma ya upashaji habari ili kuweza kuisadia jamii kupata habari za ukweli na uhakika.

Kwa upande wake,Afisa ulinzi na usalama wa Mtandao wa (THRDC)Benedict Ishabakaki,ameitaka jamii kutopuuza vitisho wanapovipokea kwa njia ya simu au katika mitandao ya kijamii na badala yake waripoti katika mashirika ya kutetea haki za binadamu.

Alisema kupuuza kitisho chochote kinaweza kuleta athari katika maisha ya mtu na hivyo ni vyema kila jambo  kulichukulia kama dhara na kuwa mwepesi wa kuliripoti na kulichunguza na kuweza kuchukuliwa hatua ili kutokomeza ukiukwaji wa haki za binadamu.

“Suala la ulinzi na usalama ni la mtu mwenyewe ila unaweza pia ukamsaidia mwenzako kama unaona kuna kitisho kwa mwenzako unalitolea taarifa au kulisemea kwa vyombo husika” alisema Ishabalaki

Alisema ni jukumu la kila mmoja kuwa mtetezi wa haki za binadamu na kutambua mbinu za kujilinda na kuwa wasiri wa kutoa taarifa za vitendo vya uvunjifu wa haki za binadamu na hivyo kuitaka jamii kuwa watetezi wa haki za binadamu.

                                                                                   Mwisho