SHULE IKO NA WANAFUNZI 143 DARASA MOJA MWALIMU MMOJA

Tangakumekuchablog

Tanga, SHULE ya msingi ya Putini kata ya Chongoleani halmashauri ya jiji la Tanga yenye wanafunzi 143 wanasoma chumba kimoja baada ya shule hiyo kuwa  mwalimu mmoja ,chumba kimoja cha kusomea na uhaba wa madawati.

Mwalimu mkuu wa shule hiyo, Antony Saimon, amesema wanafunzi hao wanalazimika kukaa darasa moja na kufundisha baada ya kukosa chumba cha kufundishia na kufundisha kwa awamu.

Amesema hulazimika kufundisha kwa awamu tatu ambapo wanafunzi hulazimika kuja asubuhi kwa wakati kisha kukaa maeneo ya shule ili kusubiri wenzao kumaliza kipindi jambo ambalo limekuwa gumu hasa kutokana na kuwa mwalimu pekee.

“Shule hii mimi ndie mwalimu pekee wa vipindi vyote unavyovijua hata ukisema mwalimu msaidizi na msimamizi ni mimi mimi, kwa kweli akili muda wote inachemka kwani sitaki wanafunzi vipindi viwapite” alisema Saimon na kuongeza

“Shule hii iko na chumba kimoja tu cha kufundishia na wanafunzi wengi wanasomea chini, changamotio nyengi shule iko na matundu mawili ya choo ambavyo maji ndio tatizo” alisema

Alisema shule hiyo inakabiliwa na changamoto nyingi zikiwemo za ukosefu wa maji na ambapo iko na matundu mawili ya choo hivyo kupatwa na kitisho cha kuzuka kwa magonjwa ya miripuko.

Akizungumzia kero hiyo, mwenyekiti wa Serikali ya  kijiji, Abdalla Said, alisema shule hiyo imejengwa kwa nguvu za wananchi na kwa sasa imekwama kutokana na kukosekana kwa pesa za kuiendeleza na vipindi vya mvua watoto wamekuwa wakiteseka.

Alisema nyakati za mvua na jua masomo husimama kutokana na watoto wote kurundikana kwenye darasa moja ambapo nyakati za hali ya hewa ya kawaida hufundishwa kwa awamu.

“Ile kauli mbiu ya hapa kazi tu nawaomba wadau wa elimu kuja vijijini kujionea na wasikae mjini ambako changamoto sio kubwa kama kwetu” alisema Said

Alisema changamoto za vijijini ni kubwa ambako viongozi kufika kwao ni nadra hivyo kuwataka kuisaidia shule hiyo ili kuweza kuwajenga watoto kielimu na kuweza kuwasaidia katika maisha yao ya baadae.

Akizungumzia changamoto shule hiyo inayokabiliana nayo, Afisa Elimu Msingi jiji, Halifa Shemagonge, alisema anatambua na ofisi yake inafanya  jitihada za kuhakikisha inaongeza walimu na vyumba vya madarasa.

Alisema lengo ni kumaliza changamoto za shule zote ikiwemo uhaba wa walimu kwa baadhi ya masomo na madawati pamoja na nyumba za walimu katika shule zote za jiji hilo.

                                               Mwisho

Wanafunzi wa darasa la awali hadi la pili shule ya msingi Putini kata ya Chongoleani halmashauri ya jiji la Tanga wakisoma darasa moja kwa awamu kufuatia shule hiyo kuwa na chumba kimoja cha kufundishia na uhaba wa madawati.