SITASAHAU NILIVYOGEUZWA PAKA SEHEMU YA 14

HADITHI   SIMULIZI ZA FAKI A FAKI 0655 340572   SITASAHAUNILIVYOGEUZWA PAKA 14   ILIPOISHIA   Katika nyumba nyingi za waswahili swichi ya taa ya ukumbini hukaa katikati ya ukumbi. Nikasikia hatua za mtu akitembea hapo ukumbini. Nilihisi mtu huyo ndiye huyo aliyeambiwa awashe taa ya ukumbini.   Nilijua kuwa taa ikiwaka nitaonekana pale mlangoni na kipigo nitakacho kipata kitakuwa cha kunimaliza kabisa. Hofu ya kuuawa kikatili ikanifanya niusukume tena ule mlango, sasa kwa nguvu zaidi. Ulipogoma tena nikajaribu kuuvuta kwa ndani. Mlango ukafunguka.   Kumbe mlango huo ulikuwa ukifunguka kwa ndani lakini kwa kiwewe kilichonipata nikawa niliusukumia kwa nje.   Mlango huo ulipofunguka nilichomoka kama nta uliotoka kwenye upinde. Nilikwenda mbio nikiwa uchi. Nikapita kwenye vichochoro na hatimaye kwenye mapori mpaka nikatokea kwenye ule uwanja wetu tunapokutania.   Wachawi wenzetu wote walikuwa wamejikusanya wakijadiliana. Wakashituka waliponiona ninakuja mbio.   "Kulikoni...kulikoni...mbona unakuja mbio, tena uko peke yako? Wenzako wako wapi?" bibi akaniuliza akiwa amepatwa na mshituko.   "Huko tulikokwenda si kuzuri. Wenzangu wamenasa chumbani kwa mwalimu, hawawezi kutoka. Niliyeweza kutoka ni mimi peke yangu, tena nilipitia kwenye mlango”   Wachawi wote wakashikwa na mshangao.   "Hebu tueleze vizuri, imekuwaje?" bibi akaniuliza.   Nikawaeleza yote yaliyotokea tangu tulivyokwenda mpaka nilivyotoka kwa kuponea tundu ya sindano.   "Nina hakika hivi sasa, Bi Kisindano na Bi Tausi wameshakamatwa mle chumbani. Sasa sijui nini kitatokea!"   "Ni wapumbavu, kwani wao walishindwa kujua kwamba nyumba yenyewe haiingiliki?" bibi akasema kwa kufoka kisha akaongeza.    "Kwanza unapokwenda kwenye nyumba ya mtu unaipima, unapoona haingiliki unaiacha. Sasa wao wameingia ndani kisha wanashindwa kutoka. Shauri zao!"   "Wakati wanakuambia tumenasa, wewe ulikuwa unajionaje?"   "Mimi nilijiona niko sawasawa tu"   "Ni kwa sababu wewe bado hujaiva sawasawa, ni kama mwanafunzi. Pia mle ndani hukuwachawia wale watu, ulikuwa unaangalia tu”   "Ni kweli, mimi nilikuwa nawaangalia tu"   "Sasa tuondokeni, kila mtu aende kwake. Asubuhi tutapata habari zao"   Tukachangukana. Mimi na mke wangu tukaenda kuvaa nguo zetu tukaondoka.   Karibu njia nzima nilikuwa namueleza mke wangu kisa hicho. Hofu ilikuwa bado imenitawala.Tulipofika nyumbani tulilala hadi asubuhi.   Asubuhi ndipo tulipopata habari kuwa kuna wanawake wawili walikutwa usiku chumbani mwa mwalimu mkuu wa shule ya msingi ya pale kijijini wakiwa uchi. Walipoulizwa wao ni kina nani hawakuwa na jibu. Wakatolewa nje wakapigwa mpaka wakauawa.   Mimi na mke wangu tulipozisikia habari hizo tukajua walikuwa ni Bi Kisindano na Bi Tausi.   "Kumbe wameuawa masikini!" nikajiwazia kimoyomoyo.   Mke wangu alipopata habari hizo akatoka kwenda kuwambia wenzake. Baadaye alirudi na kuniambia.    "Bibi alikuwa anazo habari"   "Habari zipi?" nikamuuliza   "Kuwa Bi Kisindano na Bi Tausi wameuawa"   "Sasa amejua kuwa hii kazi si nzuri?"   "Amesema wameuliwa kwa upumbavu wao"   Nikatikisa kichwa changu kusikitika.   "Hakuwaonea huruma wenzake?”   "Si bora wewe umesalimika"   "Je kama ningeuawa na mimi?"   "Wewe ni mume wangu, ungeuawa ningesikitika na ningelia lakini sio yule bibi"   Nikashusha punzi.   "Mke wangu kwanini tusiachane na huu uchawi?"   "Unasemaje?"   "Huoni hii ni kazi ya kifo?"   "Fuata miko unayopewa.Bila shaka wale wamevunja miko"   "Kwa maana hiyo unataka tuendelee tu?"   "Hatuwezi kuacha. Ukiacha wenzako watakuua!"   "Tutaondoka hapa kijijini"   "Hakuna. Hatuwezi kuacha wala hatuwezi kuondoka. Acha maneno hayo. Wale wanawake wamekutia hofu, kwani wanakuhusu nini visirani wale?"   "Wale ni wenzenu, unawaita visirani?"   "Na wewe pia ni wenzako, si mlikwenda pamoja?"   Nilipomuona mke wangu anaanza kuhamaki nikaamua kuachana naye, yasije yakaja mengine kwani nilijua angeweza kuniletea vitisho vya kwenda kuniripoti polisi kuwa nimemuua mke wangu wa kwanza.   Kwa kweli tukio la kunasa, kukamatwa na hatimaye kuuawa kwa wanawake hao lilikuwa limenitia hofu sana. Kwanza mimi sikujua kama mchawi anaweza kunasa mahali. Na pia sikujua kuwa mchawi anaweza kuuawa kama mwizi.   Kwa hiyo nilijua tukio kama hilo iko siku linaweza kunitokea mimi au mke wangu.Tunaweza kwenda sehemu tukanasa na kukamatwa kisha tukapigwa na kuuawa.   Lakini sikuwa na la kufanya. Nisingeweza kujitoa peke yangu. Ilibidi nimshawishi mke wangu. Lakini mke mwenyewe kila ninavyomueleza alikuwa hanielewi.   Jingine nililojifunza kwa wachawi hao ni kuwa hawahurumiani wala hawana ushirikiano.Ushirikiano wao ni kwenye uchawi tu. Kwa upande wangu niliona nisingeweza kuendelea kuishi na watu kama hao.   Sasa nifanye nini? nikajiuliza.   Kama mke wangu angekubali kutoka kusingekuwa na tatizo.Tatizo ni kujitoa mimi peke yangu. Hilo lisingewezekana. Kwa hiyo kwa ajili ya kulinda usalama wangu niliona niendelee kuwa katika kundi hilo huku nikitafuta namna ya kuwakimbia.   Ilipofika usiku nilimuuliza Chausiku kama mkutano wetu utakuwepo kule uwanjani.   "Kwanini usiwepo!" akanijibu kwa sauti ya kuhamaki.   Endelea kufuatilia hapo kesho Kwa matangazo, habari na matukio usifiche habari, wasiliana na chumba cha habari, simu 0655 902929