MKUU WA WILAYA YA KOROGWE AOMBWA KUOKOA JAHAZI

Tangakumekuchablog, Korogwe CHAMA cha wananchi CUF Wilayani hapa,kimemtaka Mkuu wa Wlaya ya Korogwe Hafsa Mtasiwa kuingilia kati ili kuweza kuzipatia ufumbuzi kero ambazo zimekuwa zikiwakabili wakazi wa kijiji cha Mkwakwani kata ya Mnyuzi kutokana na halmashauri ya Wilaya ya Korogwe kushindwa kuzishughulikia. Mkurugenzi wa haki za binadamu wa chama CUF Wilayani Korogwe,Masoud Rashid Mohamed aliwaeleza waaandishi wa habari  kuwa kwa muda mrefu sasa wananchi wa kijiji cha Mkwakwani wamekuwa wakikabiliwa na matatizo mengi ambapo halmashauri yao imewapuuza ikiwatelekeza. Mohamed alisema,miongoni mwa matatizo hayo yalianza mwaka 2012 kwa Serikali ya kijiji cha Mkwakwani kuwataka wananchi wenye umri kati ya miaka 18 – 50 kutozwa  michango ya Tsh 2,400/= kwa kila mwananchi wakielezwa kuwa watajengewa  sekondari jambo ambalo halijaweza kufanyika. Amelitaja tatizo jingine ni kwamba kila mwaka Kijiji hicho cha Mkwakwani kimekuwa na utaratibu wa kupata fedha kiasi cha Tsh 550,000/= kutoka msitu wa Ambangulu ambapo licha ya utaratibu huo kuendelea lakini cha kushangaza wananchi hawajaweza kufahamu fedha zao kule zilikokopelekwa. Pia Mohamed alisema kuwa wananchi wa kijiji cha Mkwakwani wanakabiliwa na kero ya kutojua ni kwanini fedha zao kiasi cha Tsh 609,000/= zinazotokana na ushuru kwa mwaka 2013/14 zimetumiwa kwenye vikao vya WDC huku viongozi wa serikali ya kijiji wakihusishwa na uvunaji wa miti ya mivule. Mkurugenzi huyo wa haki za binadamu wa CUF wilayani Korogwe alisema waanchi wamekuwa wakifanya kila jitihada ili kupata haki zao lakini wamegonga ukuta hatua ambayo imeusababisha uongozi wa CUF kumuandikia barua mkuu wa wilaya ya Korogwe Hafsa Mtasiwa ili kuingilia kati suala hilo. Alisema awali walimuandikia mkurugenzi mtendaji wa halmashauri ya wilaya ya Korogwe kumtaka kuwapatia maelezo juu ya yote ambayo yamekuwa yakijitokeza kwenye kijiji cha Mkwakwani lakini tangu wakati huo mpaka sa sa hakuna majibu yenye tija ambapo wananchi wameishia kupuuzwa. Alisema mapungufu hayo yote yamekuwa yakigunduliwa na wanachama wa CUF ambapo kwa kufuata taratibu za kisheria wamejaribu hata kuwadhibiti wahalifu akitolea mfano wa tukio la kukamatwa kwa viongozi wa serikali waluiohusishwa na kuyvuna miti ya mivule huku mpaka leo kukiwa hakuna kesi. Kutokana na hayo yote mkurugenzi huyo wa haki za binadamu wa CUF amesema kwamba mpaka sasa wamekosa imani na uongozi wa halmashauri ya wilaya ya Korogwe hali iliyowalazimu kuomba msaada wa mkuu wao wa wilaya ili kuona namna ambavyo wananchi wanapata haki zao kwa misingi ya katiba. Mkurugenzi mtendaji wa halmashauri ya wilaya ya Korogwe Lukas Mweri alipotakiwa kutoa ufafanuzi kuhusu malalamiko hayo aliahidi kuwasiliana na ngazi za chini kama ile ya kata na kijiji husika kujua chanzo cha kero hizo na namna ambavyo zinaweza kumalizwa ili kuepusha lawama hizo kwa umma.                                                        Mwisho