WAKULIMA NA WAFANYABIASHARA WALALAMIKA KUKOSA SOKO LA KUUZIA MAZAO YAO

Kumekucha blog

Korogwe, WAKULIMA na wafanyabiashara wa matunda na mbogamboga Wilayani Korogwe Mkoani Tanga, wamelalamika kukosa soko la kuuzia mazao yao na hivyo kulazika kuuza kwa bei ya  hasara kwa hofu ya kuharibika majumbani.

Wakizungumza na Mwananchi jana, mji mdogo wa Mombo, wafanyabiashara hao wamesema wanalazimika kuuza matunda yao kwa bei ya hasara baada ya kutokuwepo kwa soko na hivyo kuwaomba matajiri na wawekezaji kujenga kiwanda cha kusindika matunda Wilayani hapo.

Walisema wamekuwa wakiuza matunda yao kwa bei ya hasara kwa hofu ya kuwaozea majumbani jambo ambalo linarudisha nyuma kasi ya kilimo na baadhi ya wakulima kuacha   kilimo hicho .

“Kama unavyoona hapa matunda ni mengi sana hadi tunapatwa na hofu ya kutuozea mikononi----zikipitia siku mbili kama hujamaliza mzigo jua yatakuharibikia mikononi na kuwa hasara” alisema Jumanne Ramadhani

“Tunalazimika kuuza kwa bei yoyote ile ---hatuna soko rasmi la kuuzia matunda na tuko juu juu na kutokuwa na uhakika wa kuuza kutegemea mteja mmoja mmoja sio biashara” alisema Ramadhani

Kwa upande wake mkulima wa mapeasi, Miraji Shemdoe, alisema wakulima wengi wa matunda na mbogamboga wamepunguza kasi ya kilimo chao na kuyaacha mashamba kuwa pori.

Ameitaka Serikali kukisikiza kilio chao baada ya maombi ya muda mrefu na kupewa matumaini na kudai  hadi muda huo hakuna matumaini na hivyo kuwarejesha katika umasikini.

Alisema wakulima wa Lushoto na Korogwe wako na nafasi nzuri ya kujikwamua na umasikini baada ya ardhi yao kuwa na rutba ya kilimo ambacho hakitegemi mvua za misimu.

“Tumejaliwa kuwa na ardhi nzuri yenye rutba ya kilimo cha aina yoyote lakini soko ndio shida----wakulima wengi wamebadilisha aina ya kilimo na sio matunda tena” alisema Shemdoe

Alisema kuwepo kwa soko la uhakika wakazi  wa ndani na nje ya Wilaya hiyo wangeshawishika kulima kilimo hicho na Serikali kupata mapato yatakayosaidia huduma za kijamii Wilayani humo.

                                           Mwisho