IMAMU MKUU MSIKITI WA IBADHI TANGA AOMBA AMANI

Tangakumekuchablog

Tanga, IMAMU Mkuu wa Msikiti wa Ibadhi Tanga, Sheikh Mohammed Said, ameitaka jamii kuelekea Uchaguzi Mkuu kudumisha amani na utulivu uliopo na kuacha kushabikia vyama vya siasa na kupelekea kuhamasiana.

Akihutubia Swala ya Idd El Fitri jana, Sheikh huyo alisema ni wajibu wa kila mtu kutambua kuwa amani iliyopo ikitoweka ni vigumu kuirejesha  na hivyo kila mmoja kuhakikisha anatambua wajibu wake.

Alisema vipindi vya chaguzi hutokea jamii kuhamasiana kwa mambo ya kisiasa jambo ambalo amedai kuwa ni baya na halifai kutokea na hivyo kuitaka kutambua amani iliyopo na kila mmoja kuwa mlinzi wa mwenzake.

“Ndugu zangu waislamu leo tumekusanyika hapa tukiwa kitu kimoja ndugu moja na hakuna mbora kwa mwenzake----hadhara hii iwe kichocheo cha umoja wetu kwa kupendana na kuhurumiana” alisema Mohammed

Sheikh huyo aliitaka jamii kupendana na kuhurumiana na kuwa na ada ya kusameheana kwa kila jambo na kudai kuwa kufanya hivyo kutapelekea kupata rehma za Allah.

Alisema kuna baadhi ya watu wamekuwa hawasemeshani wala hawatembeleani jambo ambalo amesema ni baya kwa Mwenyezi Mungu na hivyo kuwatAka kuitumia siku hiyo kwa kusameheana.

Akizungumzia kuhusu kuwasaidia yatima na wasiokuwa na uwezo, Sheikh Mohammed aliwataka wenye uwezo kuwapatia misaada na kuweza kujikimu na maisha kama wengine .

Alisema kufanya hivyo kutaiwezesha jamii hiyo kuishi maisha mazuri kama wengine  na kuacha kunung’unika kukosa huduma muhimu za kujikimu.

Alisema watu wasiokuwa na uwezo wamekuwa wakipata shida nyingi zikiwemo za matibabu na elimu hivyo ni wajibu watu wenye uwezo kuziangalia jamii hizo.

                                             Mwisho

Waislamu wakinunua nyama soko kuu la Ngamiani Tanga ikiwa ni kusherehekea Sikukuu ya Idd El Fitri iliyosherehekewa na Waislamu kote Ulimwenguni jana.