MUHEZA WAPATA JEMBE NAFASI YA UBUNGE

Tangakumekuchablog

Muheza, MDAU wa maendeleo ambaye  pia ni  Kada wa Chama Cha Mapinduzi (CCM)  Wilayani Muheza  Mkoani Tanga, Omary  Mhando maarufu (walawala)  amesema endapo atateuliwa kuwa Mbunge atahakikisha kero ya maji Wilayani humo inafikia kikomo.

Omary maarufu kwa jila la walawala alichukua fomu jana ya kuomba ridhaa ya kuteuliwa kugombea nafasi ya Ubunge jimbo la Muheza na kueleza vipaumbele vyake na kusema jambo la kwanza ni kulimaliza tatizo la maji na soko la machungwa.

Alisema kwa miaka mingi wakazi wa Muheza wamekuwa katika shida ya kupata maji na badala yake wanatumia maji ambayo sio salama na hivyo kuwataka wakazi wa jimbo la Muheza kumuunga mkono ili kuwa Mbunge wao.

“Kipaumbele changu cha kwanza ni kuhakikisha kero ya maji ninaipatia ufumbuzi wa haraka-----hakuna sababu sisi kukosa maji wakati vyanzo vingi vipo ikiwemo milima na mito” alisema Walawala na kuongeza

“Niwaahidi wananchi wa jimbo hili kuwa nimejitolea kuwahudumia kwa nguvu zangu zote----sehemu ya mapato katika biashara zangu nitayaingiza kusukuma maendeleo” alisema

Akizungumzia kilimo cha machungwa Wilayani humo, Walawala alisema hakuna sababu ya mkulima wa zao hilo kuwa masikini kwa humnufaisha mtu wa nje na hivyo kusema atazungumza na wawekezaji wa ndani na nje kujenga kiwanda cha kusindika matunda na uwepo wa soko la uhakika.

Alisema kwa miaka mingi mkulima wa Muheza ni mlalahoi hana mabadiliko katika kilimo chake na wakati wa mavuno wamekuwa wakilanguliwa na kuwatajirisha wageni kwa kuuza kwa bei ya kutupa.

“Muheza imejaliwa kuwa na rutba nzuri kwa kilimo cha mahindi miwa na machungwa----iweje leo mkulima huyo anazidi kuwa masikini na kufanywa mtaji kwa matajiri” alisema Walawala

Alisema endapo atakuwa Mbunge atajenga kituo cha kupokea na kutoa habari za kilimo kikiwa na lengo kupeana taarifa za matukio ya kilimo yakiwemo ya kutokomeza wadudu waharibifu akiwemo Nzi wa machungwa.

                                                     Mwisho 

 Kada maarufu wa CCM  Wilayani Muheza Mkoani Tanga, Omary Mhando Almaarufu (Walawala) akizungumza na waandishi wa habari na wazee wa CCM nyumbani kwake jana mtaa wa Majengo kuhusu nia yake ya kugombea nafasi ya Ubunge jimboni humo.

 Kada Maarufu wa CCM  Wilayani Muheza Mkoani Tanga, Omary Mhando maarufu (Walawala)  (kulia) akikabidhiwa fomu ya Ubunge na Katibu Msaidizi CCM Wilaya ya Muheza, Tija Magoma jana.