POLISI KOROGWE YAWANASA WASAFISHAJI MIRUNGI KIAINA

Tangakumekuchablog

Korogwe, POLISI Wilayani Korogwe Mkoani Tanga, unawashikilia watu wanne kwa tuhuma za kusafirisha mihadarati aina ya mirungi wakiwa wameificha kwenye lori lililokuwa likisafirisha chuma chakavu.

Akizungumza na waandishi wa habari jana ofisini kwake, kamanda wa pilisi Mkoani Tanga, Zubery Mombeji, alisema tukio hilo lilitokea juzi saa 1 usiku katika kizuizi cha polisi Mombo na kusema kuwa mirungi hiyo ilikuwa na uzito wa kilo 328.

Aliwataja watuhumiwa hao kuwa ni Phillipo Martin (29), Emannuel Mafika (20), Juma Ali (28) na Lucas Mirart (25) wote wakiwa ni wakazi wa Kilimanjaro na  wanahojiwa  ili kukamilisha upelelezi na kuweza kufikishwa mahakamani.

“Wakati wa ukaguzi wa gari polisi ilisikia harufu kali ya mirungi jambo lililowasukuma kuamini kuwa imebeba mihadarati baada ya watu wanne kuweko katika tela la gari” alisema Mombeji na kuongeza

“Wale watu walipobaini polisi imeshagundua walitaka kutoroka na ndipo ilipowaweka chini ya ulinzi wakati wako katika upekuzi----lile lori lilibeba chuma chakavu  na chini ndiko walikoficha magunia manne yenye uzito wa kilo zaidi ya mia tatu” alisema

Alisema kukamatwa kwa watu hao, polisi Tanga inataka kukomesha biashara haramu na upitishaji wa mali za kimagendo kwa kuweka vizuizi vingi jambo ambalo litasaidia kukomesha biashara hizo haramu.

Katika tukio jengine kamanda Mombeji alilitaja tukio la bibi wa miaka 70 mkazi wa kijiji cha Kimbe Wilayani Kilindi , Mariam Omary kujihusisha na uuzaji wa bangi .

Alisema kwa muda mrefu polisi ilikuwa ikifuatilia nyendo za bibi huyo na ndipo ilipoweka mitego ya kumnasa nyumbani kwake akiwauzia wateja bangi pamoja na unga.

“Polisi kwa muda ilikuwa na taarifa za kuwepo kwa bibi muuza bangi na unga---lakini tulikuwa makini na taarifa hizo kwani ilichukua miezi mitatu tunamchunguza na ndipo juzi walipovamia nyumba yake na kumkuta akiwa na fuko la bangi na unga akiwauzia wateja wake” alisema Mombeji

Alisema kwa sasa ajuza huyo  anahojiwa na polisi kutaka kujua mtandao mzima wa biashara hiyo na kwa sasa imepata taarifa za watu ambao wamekuwa akishirikiana nae.

Alisema taarifa za awali zimepelekea kukamatwa kwa watu watano ambao hata hivyo kamanda hawakuwataja na kusema kuwa hadi ushahidi utakapokamilika watatajwa hadharani.

                                             Mwisho

 Mkuu wa Operesheni Wilaya ya Korogwe Mkoani Tanga, Jeremia Ouko (kulia) akiwaonyesha waandishi wa habari mihadarati aina ya mirungi viroba vinne vilivyokuwa na uzito wa kilo 328  vilivyokamatwa katika lori lililokuwa  likisafirisha chuma chakavu kutoka Kilimanjaro kuelekea Dar es Salaam juzi katika geti la Mombo.

 Kamanda wa polisi Mkoani Tanga, Zubery Mombeji (kushoto) akiwaonyesha waandishi wa habari mihadarati aina ya mirungi viroba vinne  yenye kilo 328 iliyokamatwa Wilayani Korogwe kwenye lori lilikuwa limepakiza chuma chakavu. Kulia ni Mkuu wa Operesheni Wilaya ya Korogwe, Jeremia Ouko.