MUSSA MBAROUK WA JIMBO LA TANGA MJINI (CUF) ASHINDA KESI

Tangakumekuchablog

Tanga, MBUNGE wa jimbo la Tanga mjini,(CUF) Mussa Mbarouk, amewataka wananchi kumpa ushirikiano kuleta maendeleo jimboni humo na kusema kuwa ahadi zake zote alizozitoa wakati wa kampeni  uchaguzi mkuu uliopita atazitekeleza.

Akizungumza nje ya mahakama baada ya kushinda kesi yake iliyofunguliwa na aliekuwa mpinzani wake , Omari Nundu (CCM) alisema kwa sasa anajisikia furaha na kujiona Mbunge kamili ambapo kasi yake ya kuwaletea maendeleo wananchi anaianza.

Alisema kesi hiyo ilikuwa ikimyima usingizi na kushindwa kufanya lolote la maendeleo kwa wananchi na badala yake akili na nguvu ilikuwa iko katika kesi jambo ambalo wananchi walikuwa katika sintofahamu ya kujua hatima ya kesi hiyo.

“Leo niko na furaha na kujiona ni  mbunge kamili baada ya mahakama kunipa ushindi wa kesi  iliyofunguliwa na mpinzani wangu katika kinyang’anyiro cha ubunge Omari Nundu” alisema Mbarouk na kuongeza

“Niwaambie wananchi wa jimbo la Tanga bila kuangalia itikadi za vyama mimi ndie mbunge wao hivyo nitahakikisha ahadi zangu nilizozitoa wakati wa kampeni nitaanza kuzitekeleza” alisema

Akizungumzia usafi wa mazingira Mbunge huyo alisema jiji la Tanga ni chafu na haliendani na hadhi ya jiji hivyo kuwataka wananchi kuhakikisha wanaweka mazingira ya usafi maeneo yao kujikinga na magonjwa ya miripuko.

Alisema jiji hilo ni chafu na limejaa madampo ambayo takataka zake zimekuwa zikikaa kwa muda mrefu bila kuondolewa hivyo kuahidi kulipatia ufumbuzi kwa kuiomba halmashauri kuongeza gari la kuzolea takataka.

“Jiji letu kwa kweli haliendani na hadhi ya jiji limejaa madampo na kuwa kero kwa wananchi hasa kipindi hiki cha vitisho vya magonjwa ya miripuko ukiwemo wa kipindupindu” alisema Mussa

Alisema ili kuliweka katika mazingira ya usafi kwanza ni mtu ahakikishe eneo linalomzunguka linakuwa katika usafi pamoja na kuwa na utaratibu maalumu kwa chombo cha kuhifadhia takataka.

                                              Mwisho