SOMA HABARI KUBWA ZILIZOPEWA UZITO MAGAZETI YA LEO, JULY 09 TZ

Uchambuzi huu wa magazeti unaletwa kwenu kwa hisani kubwa ya kituo cha Elimu Cha Candle Education Centre Tanga. Kituo kinaongoza kufaulisha wanafunzi kidato cha pili hadi cha sita na wanaojiendeleza kielimu. Kituo kinatoa kozi mbalimbali za kitaaluma ikiwemo ya ufundi  umeme pamoja na kutoa kozi ya Kiingereza na Computer. Kituo kipo Tanga mkabala na Bank ya CRDB simu 0715 772746

UHURU

Watu wanne wamezirai na kukimbizwa katika hospitali ya Nyahururu, Kenya baada ya kuzidiwa kwa kukosa pombe.

Kulingana na madaktari katika hospitali hiyo, wanaume hao walilazwa baada ya juhudi za kuwarejeshea fahamu kwa kuwanywesha maziwa kugonga mwamba.

Ofisa matibabu katika hospitali hiyo ambaye alikataa jina lake kutajwa alisema  wanaume hao walianguka na kukosa fahamu baada ya kukosa pombe walioachishwa gafla.

“Kawaida mtu akiwa na mazoea ya kunywa pombe kisha kumwachisha ghafla mwili huhisi kukosekana kwa kiungo muhimu”.

Alisema kwa sasa watu hao wanaendelea vizuri na matibabu  na kufuatia tukio hilo walevi waliokuwa kwenye kampeni ya kuacha ulevi wameishutuma Serikali kwa hatua ya kuwalazimisha kuacha pombe gafla.

Wakazi wengi wa eneo hilo walisema  hawawezi kufanya kazi bila kunywa pombe kwa kuwa inawasaidia kuwaongezea ari ya kujituma

MWANANCHI

Mbunge wa Singida Mjini (CCM) na mfanyabiashara maarufu nchini, Mohammed Dewji amewaliza baadhi ya wapigakura wake wakati akitangaza kutogombea tena nafasi hiyo katika Uchaguzi Mkuu ujao kwa ya madai ya kubanwa na majukumu ya kifamilia na biashara.

Dewji ambaye amekuwa mwakilishi wa jimbo hilo kwa awamu tatu mfululizo, alitangaza uamuzi wake huo kwenye mkutano wa hadhara uliohudhuriwa na umati mkubwa wa wananchi.

Alisema kuwa aliomba ridhaa ya kuwatumikia wananchi wa Singida Mjini mwaka 2000, hakuwa na familia na pia biashara zake hazikuwa kubwa kama ilivyo sasa.

Alisema katika kipindi chote cha uwakilishi wake, wakazi wa Singida Mjini wamempa heshima kubwa, ukarimu wa hali ya juu, wema uliotukuka na uvumilivu usio na kifani na kwa hali hiyo, hatawasahau kamwe na ataendelea kuwatumikia kupitia mfuko maalumu aliouanzisha.

Aliwataka wakazi hao kuendeleza moto wa maendeleo waliouwasha miaka 10 iliyopita kwa miaka mingine kama hiyo ijayo ili jimbo hilo lipige hatua zaidi.

“Kwa kutambua heshima mliyonipa na imani kubwa mliyonionyesha kwa vipindi vyote vya uongozi wangu, ingawa nina huzuni lakini sina budi niwaombe kuwa mwaka huu wa uchaguzi sigombei tena na ninatoa fursa kwa kada mwingine wa CCM anipokee kijiti hiki kuliongoza jimbo letu,” alisema kwa huzuni. Baada ya kutamka maneno hayo, wananchi wengi katika walipiga kelele kwa nguvu wakionyesha kutokubaliana na uamuzi wake. Huku moja ya sauti ikisikika… “Hatutaki mbunge mwingine ni wewe tu hadi tukuchoke.”

Awali, Dewji alitaja baadhi ya maendeleo yaliyofanyika katika vipindi vyake, kuwa ni pamoja na kujenga shule 15 za sekondari kutoka mbili zilizokuwapo.

Alisema kwa kutumia fedha zake alijenga na kuchimba visima 45 vya majisafi na salama.

MWANANCHI

Mwanasiasa mkongwe wa CCM, Kingunge Ngombale-Mwiru amemshukia Katibu wa Itikadi na Uenezi wa chama hicho, Nape Nnauye kwa kauli zake alizodai zinaminya demokrasia na kwamba CCM haiwezi kusimama wanapopambana wenyewe kwa wenyewe.

Kingunge ambaye hivi karibuni aliweka bayana kumuunga mkono Mbunge wa Monduli, Edward Lowassa katika harakati zake za kuwania urais, alisema hakubaliani na kauli ya Nape kuwa wagombea wasioridhika na uamuzi wa Kamati Kuu (CC), hawawezi kukata rufaa kwa sababu ya muda kuwa mfupi.

Alisema CCM imeweka utaratibu wa wanachama kudai haki zao ndani ya chama, pindi wasiporidhishwa na uamuzi wa vikao vya chini.

Alisema mwaka 2005, mgombea wa nafasi ya urais, John Malecela alikata rufaa katika Halmashauri Kuu ya Taifa (NEC) baada ya jina lake kutopelekwa.

“Aliyekuwa mwenyekiti wa chama wakati ule Mkapa (Benjamin), alikubali baada ya kushauriana na wenzake kwa sababu haikuwa zawadi, bali ni haki yake,” .

Hata hivyo, alisema baada ya kujielezea mbele ya NEC na wajumbe kuulizwa, walikubali kuwa majina matano yaliyoletwa na CC yanatosha.

“Kufikiria kwamba mtu akose haki kwa sababu ya kukosa muda huko ni kuwakosesha watu haki,” .

Kingunge alisema amani na utulivu ni mambo yanayojengwa kwa haki na lazima imani ijengwe na viongozi.

Alisema lugha za kibabe ambazo zimekuwa zikitolewa na baadhi ya viongozi huku chama kikaa kimya ndizo zinazowatia watu shaka.

“Sasa hivi kumekuwa na nguvu kubwa ya kupambana ndani ya chama kuliko wapinzani… nyumba ikigawanyika haiwezi kusimama na CCM haiwezi kusimama inapopambana yenyewe kwa yenyewe,” alisema.

Alisema kukiwa kuna jitihada za kunyima haki watu, kunaweza kusababisha machafuko.

MWANANCHI

Wakati Mbunge wa Arumeru Mashariki, Joshua Nassari akisema anashindwa kuamini kilichotokea na kunusurika katika ajali ya helikopta juzi, mmiliki wa chopa hiyo, Philemon Ndesamburo amesema atanunua nyingine haraka kabla ya kuanza kampeni za Uchaguzi Mkuu.

Kauli hizo zilitolewa jana ikiwa ni siku moja baada ya helikopta hiyo inayomilikiwa na Ndesamburo kupitia kampuni yake ya Keys Aviation kupata ajali wakati ikitumiwa na Nassari na baadhi ya viongozi wa Chadema.

Wakati ikipata ajali, ilikuwa imekodishwa na Kampuni ya General Aviation Services (T) Ltd inayomilikiwa na Kapteni William Slaa.

Katibu wa Ndesamburo, Basil Lema alisema ilipata ajali baada ya kupigwa na kimbunga wakati anga likiwa limefunikiwa na wingu zito.

“Mheshimiwa Ndesamburo amemshukuru Mungu kwa kuwanusuru watu waliokuwa kwenye ndege hiyo ambao ni pamoja na Mbunge Joshua Nassari.

“Ameweka wazi kwamba atalazimika kununua nyingine mapema kwa ajili ya kuongeza nguvu kwenye kampeni za Uchaguzi Mkuu mwaka huu,” alisema Lema akimnukuu Ndesamburo.

Lema alisema rubani aliyekuwa akiendesha helikopta hiyo alifanikiwa kuielekeza juu ya miti alioutumia kupunguza kasi ya kushuka chini na kusaidia abiria kutoka salama.

“Imeharibika lakini abiria wote ni wazima. Walikuwamo wanne,” alisema na kuongeza kuwa helikopta hiyo ndiyo iliyotumiwa na Chadema katika Uchaguzi Mkuu wa 2010 na Uchaguzi wa Serikali za Mitaa mwaka jana na chama hicho kilitegemea kuitumia katika Uchaguzi Mkuu ujao.

Pia, imewahi kutumiwa na makada mbalimbali wa CCM akiwamo Naibu Katibu Mkuu wa CCM, Mwigulu Nchemba na kada maarufu wa Moshi mjini, Buni Ramole.

Akizungumza na waandishi wa habari katika wodi alikolazwa kwenye Hospitali ya Seliani – Arusha, Nassari alisema waliporuka kutoka Leguruki, hakukuwa na dalili zozote za kuchafuka kwa hali ya hewa, lakini dakika chache baada ya kuruka angani wingu zito lililoambatana na upepo mkali liliwafunika ghafla.

“Wingu lile na upepo ule sijawahi kuona katika maisha yangu yote zaidi ya kusoma kwenye vitabu vya simulizi vya mambo ya ushirikina. Namshukuru Mungu wote tuko salama kwani hatukuwa na matumaini ya kupona ajali ile,”Nassari.

NIPASHE

Watoto watano wa familia moja wamefariki dunia na mama yao mzazi kujeruhiwa vibaya, baada ya nyumba waliyokuwa wakiishi kuteketea kwa moto wakati wamelala usiku.

Tukio hilo lilitokea Julai 6, mwaka  huu, saa 3:00 usiku katika kitongoji cha Muleba kijiji cha Muleba kata ya Rwabwere Wilaya ya Kyerwa mkoani Kagera.

Inadaiwa kuwa chanzo cha tukio hilo ni kibatari kilichokuwa kimewashwa kudondoka chini na moto kushika nyumba hiyo ambayo ilikuwa imejengwa kwa makuti ya migomba na kuteketea kwa moto.

Watoto waliokufa papo hapo kutokana na kuungua vibaya kwa moto ni Zaituni Mohamed (mwaka mmoja na miezi 3);  Atwaibu Mohamed  (4);  Sajira Mohamed (3) na Shine Mohamed  (7).  Khadija  Mohamed (5) alifariki dunia  baada ya kufikishwa Hospitali Teule ya wilaya hiyo ya Nyakahanga kwa matibabu.

Mama mzazi wa watoto hao, Sania Mohame,  amejeruhiwa na kulazwa hospitalini hapo akiendelea kupata matibabu.

Katika wodi ya hospitali hiyo alikolazwa kwa matibabu, Sania alisema ameungua mwilini wakati akiwaokoa  watoto  wake.

Hata hivyo, alisema hakufanikiwa kuwaokoa watoto hao kutokana na moto kumzidi.

Mwenyekiti wa serikali ya kijiji  hicho, Edson Salvatory, alithibitisha kutokea kwa tukio hilo na kuwashauri wananchi kutumia taa zinazotumia mwanga wa  jua (solar) au tochi za gharama nafuu ili kuepuka madhara yatokanayo na vibatari.

Mganga Mkuu wa hospitali  hiyo, Andrew Cesari, pia alithibitisha kupokelewa kwa  majeruhi wawili, mama na mwanawe na mmoja  kufa kabla ya kuanza kupatiwa matibabu kutokana na kuungua vibaya sehemu kubwa ya mwili wake.

Dk. Cesari alisema mama wa watoto hao wanaendelea kupatiwa matibabu na hali zao zinaendelea vizuri.

NIPASHE

Kikao cha 46 cha Mkutano wa 20 wa Bunge la kumi, jana kilihairishwa na wabunge wa CCM kujifungia kutaka kujua kama kiinua mgongo chao ni Sh. milioni 160 au 238 kwa kila mbunge.

Taarifa zinadai kuwa wabunge hao hawajalipwa kiinua mgongo hadi jana na hawajui kitakuwa ni kiasi gani.

Gazeti moja liliripoti kuwa wabunge hao waliwasilisha ombi la kuongezea mafao yao kutoka Sh. milioni 160 hadi 238, ambalo lilikubaliwa na rais, lakini Hazina ilipopiga hesabu wakaona wanachostahili kulipwa Sh. milioni 160 kila mmoja.

Hata hivyo, Bunge jioni lilishindwa  kuendelea kutokana na wabunge wa CCM kujifungia kwenye kikao cha kujadili suala hilo huku Spika akiwa na kikao cha uongozi wa Bunge.

Kuhairishwa kwa kikao hicho, kulitokana na kauli ya Mbunge wa Sikonge (CCM), Said Mkumba, kutoa hoja ya kuhairishwa ili wabunge wa CCM wajadili kwa kina maslahi ya walimu kwa maana ya mishahara, posho na kiinua mgongo chao.

Naibu Spika aliwahoji wabunge ambao waliunga mkono na kwenda kwenye kikao cha chama na alitangaza kuahirisha kikao hadi leo kwa ajili ya kukaa kama kamati kupitisha vifungu vya muswada huo.

Asubuhi, wakati wa mjadala wa muswada wa Tume ya Utumishi wa Walimu 2015, Mbunge wa Nzega, Dk. Khamis Kigangwala, aliomba muongozo wa Mwenyekiti, Mussa Zungu, juu ya minongono iliyopo ambayo itapelekea ratiba ya leo kubadilika.

Mbunge huyo ambaye ni mjumbe wa Kamati ya Uongozi, bila kuweka bayana suala husika, alisema ni vyema likaandaliwa na wabunge ili kuifanya kamati hiyo kulijadili na kutoa uamuzi.

Baada ya mjadala kuhitimishwa na Mawaziri kujibu hoja mbalimbali, Dk. Kigangwala aliomba muongozo na kutaja vifungu vya kanuni vinavyoweza kuondolewa kwa hoja iliyopo kwa wakati huo ili kupatia ufumbuzi suala lolote.

“Kanuni inaruhusu hoja inayoendelea, nipewe fursa ya kuondoa hoja ya shughuli zilizopangwa kesho, tutatue ufumbuzi ili kesho kamati ya uongozi ikikutana liwe limeisha,” alisema.

Aidha, Mwenyekiti alisema anatambua hoja inayozungumziwa lakini hawezi kuruhusu ikajadiliwa kwa kuwa itapata ufumbuzi na kiti cha Spika kitatoa majibu.

Wakati wa kikao hicho jioni, baada ya Naibu Spika, Job Ndugai, kuruhusu shughuli kuendelea, Mbunge wa Sumve, Richard Ndassa, aliomba muongozo juu wa kutaka shughuli za Bunge kusitishwa, ili washughulikie jambo lenye maslahi kwao na wafanye kazi kwa amani na akili zikiwa zimetulia.

Naibu Spika, aliwataka wabunge kuwa na subira kwa kuwa Tume ya huduma za Bunge imekutana na Spika huku akiwataka watulie kwa kuwa walianza vizuri hivyo wamalize vizuri. Hata hivyo, Ndassa hakuridhishwa na kauli hiyo na kutaka kikao kiahirishwe kusubiri kauli ya Tume au Spika kuzungumzia hatma yao.

“Sisi wabunge wako tunajitolea, tumejitolea vya kutosha, tulivyokutana ukumbi wa Msekwa mliahidi mambo yatakuwa sawa leo, kesho (leo) Bunge linavunjwa, siku haziko na sisi, unaweza kuona ni dogo kumbe ni kubwa, tumejitolea ndani na nje kwa ajili ya serikali na chama chetu,” alisema.

Waziri wa Tamisemi, Hawa Ghasia, aliwataka wabunge kutulia na kumaliza kazi iliyo mbele yao kwa kutanguliza busara mbele, kwa kuwa suala hilo linafanyiwa kazi.

Naibu Spika aliwahoji wabunge ambao waligawanyika wanaosema kikao kiahirishwe na wengine wakitaka kusiahirishwe.

Ndugai baada ya kupokea ushauri wa Mbunge wa Longido, Michael Laizer, aliitaka serikali kulibeba kwa uzito unaotakiwa suala hilo vinginevyo hali itakuwa mbaya siku ya kuvunja Bunge.

Katibu wa Bunge, Dk. Thomas Kashililah, alipoulizwa alisema anakwenda kwenye kikao na kumtaka Mkurugenzi msaidizi wa Bunge, Said Yakubu, kusikiliza waandishi. Akizungumza na waandishi, Yakubu, alisema masuala ya kiutawala ya wabunge yaneshughulikiwa ipasavyo na kuwataka waandishi kusubiri leo kama hali hiyo itaendelea.

Alipotakiwa kuweka wazi masuala ya utawala, alisema hawezi kuyataja kwa kuwa yametajwa kwenye sheria na kanuni za Bunge, hivyo yote yanashughulikiwa na kila mbunge atapata stahili yake.

NIPASHE

Vituo vitatu vya televisheni vimetozwa faini na kupewa onyo kwa kurusha taarifa zilizokiuka kanuni  za huduma ya utangajaji.

Vituo hivyo ni Chanel Ten kupitia kipindi chake cha Kanjanja Time kimepewa onyo na kutozwa faini ya Sh. milioni 2.5, Star Tv kupitia kipindi chake cha Min Buzz  kimepewa onyo na faini ya Sh. 500, 000 na Tanzania Broadcasting Corporation (TBC1) onyo na faini ya Sh. 500, 000 kwenye mojawapo wa taarifa za habari zilizorushwa na kituo hicho.

Akizungumza na waandishi wa habari jijini Dar es Salaam jana,  Mwenyekiti wa Kamati ya Maudhui ya Mamlaka ya Mawasiliano Tanzania (TCRA), Margeret Munyangi,  alisema wameamua kuchukua hatua hizo baada ya kamati hiyo kukaa na kujadili ukiukwaji wa kanuni za utangazaji za mwaka 2005.

Alisema Mei 30, mwaka huu,  kituo cha Chanel Ten kupitia kipindi cha Kanjanja Time kilichorushwa hewani kuanzia saa 2:45 hadi saa 3:10 usiku   taarifa iliyoonyesha picha ya mgonjwa akiwa katika wodi ya Hospitali ya Serikali mjini Songea huku sehemu ya makalio yake yakiwa wazi na kuonyesha vidonda.

Pia kipindi hicho kilionyesha taarifa ya walemavu wawili wakipigana hadharani huku watangazaji  wakishangilia na kukirudia mara kadha na uchochezi dhidi ya serikali kwa madaktari  ili wafukuzwe na hospitali hiyo ifungwe.

Aliongeza kuwa kipindi hicho kilionyesha taarifa ya watu  wenye ulemavu ambao walikuwa wanapigana hadharani na mtangazaji wa kipindi alisikika akishabikia kitendo hicho huku akifananisha na pambano la ngumu za kulipwa.

Kwa upande wa Star Tv,  alisema Juni 3, mwaka huu kituo hicho kilikiuka maudhui, 2005 kupitia kipindi cha Mini Buzz kilichorushwa hewani kati ya saa 12:30 jioni hadi saa 1:00 usiku.

Alisema kipindi hicho kilikiuka kanuni za utangazaji kwa kujadili mada iliyohusu ubakaji katika ndoa kwa muda ambao watoto hupata fursa ya kuangalia na kusikiliza.

Aliongeza kuwa washiriki wa kipindi hicho ambao walikuwa ndani ya gari walijadili maana ya ubakaji katika ndoa na uhalali wa mwanaume kumuingilia mkewe bila ridhaa yake huku mtangazaji  akirejea masuala hayo kama nchi ya Uganda.

Kwa upande wa TBC1, alisema Machi 21, mwaka huu kituo hicho kilivunja kanuni za huduma ya utangazaji 2005, kupitia kipindi cha taarifa ya habari kilichiorushwa hewani kati ya saa 2:00 hadi 3:00 usiku taarifa hiyo ilionyesha mtoto wa kiume wa miaka 11 ambaye alilawitiwa na vijana wawili wenye umri wa kati ya 22 na 25.

Alisema kituo hicho kilionyesha utambulisho wa picha, majina ya  ya wazazi wa mtoto, mahali anapoishi na kuonekana sehemu kubwa ya mwili wa mtoto huyo na sauti yake ikisikika, hivyo kurahisisha utambuzi wake katika jamii.

Akisema kituo hicho kimekiuka kanuni za huduma ya utangazaji 2005, Na. 9(2), (3) zinzosomeka kuwa:

NIPASHE

Ongezeko na ushuru wa mabasi mapya yanayoingizwa kutoka China limewashtua wamiliki wa mabasi kiasi cha kumtaka Rais Jakaya Kikwete aingilie kati.

Hatua hiyo imefikiwa na wafanyabiashara hao kupitia Chama cha Wamiliki wa Mabasi (TABOA), wakidai kuwa hawakushirikishwa katika mchakato uliosababisha hali hiyo.

Akizungumza na waandishi wa habari jijini Dar es Salaam jana, Katibu Mkuu wa Taboa, Ennea Mrutu, alisema ongezeko hilo la kutoka Sh. milioni 40 hadi kufikia Sh. milioni 100 litazuiwa ikiwa Rais Kikwete pekee ataingilia kati kupata suluhu yake.

Ingawa msemaji wa Mamlaka ya Mapato (TRA) hakupatikana kuelezea hali hiyo, lakini Mrutu alisema ongezeko hilo limefikiwa mapema wiki hii hivyo kuibua hofu kwao wamiliki kumudu gharama hizo.

Alisema litakuwa jambo lenye heshima kwa jumuiya ya wamiliki wa mabasi ikiwa Rais Kikwete atalizungumzia suala hilo kabla ya kulivunja Bunge leo.

 “Kama hali hii ikiendelea hivi hakuna mmiliki atakayeingiza basi jipya kutoka China. Kama unakumbuka miaka iliyopita mabasi mengi yalikuwa na chesesi za malori na yalisababisha ajali  ambazo zimepoteza maisha ya Watanzania wengi, hatutaki kuona hali hii inajirudia,”  Mrutu.

Taarifa za ndani kutoka Taboa na baadhi ya wamiliki zinaeleza kuwapo wafanyabiashara wanaokadiriwa kuingiza mabasi 15 wakati mengine 60 yakitarajiwa kuingizwa wiki ijayo.

“Kwa hali ya kawaida hatuwezi kuyatoa mabasi hayo kwa maana hatuna fedha za kulipa ushuru mkubwa kiasi hicho, kama utaratibu huu ukiendelea hatutaweza kusafirisha abiria,”  Mrutu.

Kwa habari matukio na michezo ni hapa hapa tangakumechablog