WANNE WASHINDWA KREJESHA FOMU YA URAIS

MGOMBEA URAIS KUTOKA TANGA , MUZZAMIL KALOKOLA NI MIONGOZI MWA WALIOSHINDWA KUREJESHA FOMU YA KUOMBA KUTEULIWA NAFASI YA URAIS

WATIA nia wanne waliochukua fomu za kuwania kuteuliwa na Chama Cha Mapinduzi (CCM) kuwa wagombea wa kiti cha urais wametupwa nje ya mchakato huo, baada ya kushindwa kurudisha fomu.

Walioshindwa kurudisha fomu hizo mpaka muda wa mwisho ulipofika saa 10.00 jioni jana ni Peter Nyalali, Helena Elinewinga, Anthony Chalamila na Dk Muzamil Kalokola.

Mmoja wa watia nia hao, Helena mara baada ya kuchukua fomu Juni 25, mwaka huu, alikwenda kumtembelea mmoja wa maofisa wa chama hicho akitafuta ushauri wa namna ya kufanya ili kupata udhamini, lakini baadaye aliamua kutelekeza fomu hizo bila kuondoka nazo.

Jumla ya wanachama 42 walijitokeza kuchukua fomu kwa ajili ya kuomba uteuzi huo ambapo walitakiwa kuwa na wadhamini 450 kutoka mikoa 15, ikiwemo mitatu ya Zanzibar.

Katika mkutano wake na waandishi wa habari jana, Naibu Katibu Mkuu wa CCM Tanzania Bara, Rajab Luhwavi alisema zoezi la kuchukua fomu lilianza Juni 3, mwaka huu na ulimalizika jana  Julai 2 saa 10.00 jioni.