ASHIKILIWA NA POLISI AKITUHUMIWA KUWAUWA WATOTO WAKE

Tangakumekuchablog

Lushoto,JESHI la polisi Wilayani Lushoto Mkoani Tanga, linamshikilia mkazi wa kijiji cha Shume Tarafa ya Mlalo, Mwajuma Awadhi (25) kwa tuhuma za kuwauwa watoto wake wawili  kisha kuwafukia katika shamba la mahindi.

Akizungumza na waandishi wa habari ofisini kwake jana, kamanda wa polisi Mkoani Tanga, Zubeir Mombeck, alisema tukio hilo lilitokea juzi saa  3 usiku na kuwataja watoto hao kuwa ni, Zaina Khafidhi (4) na Mwanahamish Khafidhi (2).

Alisema kugundulika watoto hao kulikuja baada ya wakulima waliokuwa wakielekea kondeni kusikia harufu kali na kuifuata na kugundua kuzikwa kitu na kutoa taarifa kituo cha  polisi Lushoto .

Alisema polisi ilifanikiwa kuifukua na kukuta miili ya watoto wawili ikiwa imezikwa na kwenda kijiji na kubainika kuwa watoto wao ni wa  Mwajuma na kumsaka hadi kumtia mikononi.

“Kwa sasa tunaendelea na uchunguzi na mara baada ya kukamilika  na ikibainika mtuhumiwa tutampeleka mahakamani-----ni tukio la ajabu na halijawahi kutokea kijijini hapo alisema  Mombeck

Kamanda alisema uchunguzi wa awali unaonyesha kuwa mama watoto huyo aliwahi kuugua kichaa na kuwa katika uangalizi wa wazazi wake na jambo kwa kipindi chote hakuna taarifa zozote za matukio mabaya aliyofanya.

Katika tukio jengine kamanda huyo alilitaja kuwa polisi Wilayani Korogwe inawshikilia watu wanne kwa tuhuma za kusafirisha  mihadarati aina ya mirungi kilo 446 katka kizuizi cha magari kijiji cha Makuyuni Wilayani humo.

Alisema tukio hilo lilitokea juzi saa 8 mchana wakati wa upekuzi wa magari na kufanikiwa kukuta magunia mawili yaliyofichwa katika uvungu wa basi la Ratco lililokuwa likitokea Arusha kwenda Tanga.

Alisema wakati polisi wakilifanyia ukaguzi walisikia harufu kali mihadarati na ndipo walipozidisha upekuzi na kuikuta ikiwa imefichwa chini ya uvungu wa basi hilo.

“Kutokana na kukithiri upitishaji wa mirungi njia ya Kilimanjaro ndio maana kila gari lipitalo tunalifanyia upekuzi wa hali ya juu---hii ni kutokomeza upitishaji wa madawa ya kulevya” alisema Mombeck

Alisema kuanzia sasa polisi watatumia vifaa maalumu vya kubaini madawa yakulevya na kufanya kazi usiku na mchana kwani mbinu za wahalifu wamekuwa wakizitumia kwa nia tofauti.

                                            Mwisho