HADITHI SEHEMU YA (9)

HADITHI hii inaletwa kwenu kwa hisani kubwa ya kituo cha Tiba cha Mkombozi  Sanitarium Clinic, Mabingwa wa magonjwa yaliyoshindikana na yaliyojificha. Mkombozi wako na mashine ya kisasa ya ugunduzi wa magonjwa yaliyofichikana na kutoa tiba ya kupona haraka. Wapo Chuda Tanga mkabala na kampuni ya mabasi ya Raha Leo, simu 0654 361333

 

NILIJUA NIMEUA (9)

 

ILIPOISHIA

 

Niliisikia waziwazi sauti yake ikihitimisha hukumu yangu kwa maneno yasemayo.

 

“Nimeridhika na ushahidi uliotolewa kwamba wewe mshitakiwa umemuua mke wako kikatili kwa kumkatakata na panga. Kwa sababu hiyo mahakama hii imekutia hatiani. Adhabu yako ni kunyongwa kwa kitanzi hadi ufe!”

 

Yale maneno “Utanyongwa kwa kitanzi hadi ufe” yalizindua akili yangu, nikazinduka kama mtu aliyetoka kwenye ndoto. Nikashusha pumzi ndefu na kuikazia macho maiti ya mke wangu.

 

Nisipobuni maarifa ya kufanya, nilijiambia, picha iliyonijia akilini nikihukumiwa kunyongwa itakuwa kweli!.

 

Nitatumia akili gani kuokoa maisha yangu? Nikajiuliza bila kupata jibu.

 

Nikaendelea kujiuliza, itakuwa sahihi kweli mke wangu afe na mimi ninyongwe?

 

Hapo hapo nikapata wazo. Nilitoka nje nikaiwasha teksi yangu kisha nikafungua mlango wa nyuma wa teksi na kuuacha wazi. Nilirudi ndani nikazima taa ya nje, nikaenda uani na kuibeba maiti ya Halima. Nikaenda nayo hadi mlango wa mbele ambao sikuwa nimeufunga kabisa.

 

SASA ENDELEA

 

Niliufungua kwa mguu nikachungulia nje. Barazani kwangu kulikuwa giza baada ya kuzima taa. Na hakukuwa na mtu yeyote aliyekuwa akipita barabarani usiku huo.

 

Nikatoka haraka na maiti ya Halima na kuipakia kwenye teksi kwa kutumia mlango wa nyuma niliouacha wazi. Niliilaza ile maiti kwenye siti kisha nikafunga mlango wa teksi na kurudi ndani.

 

Nilikwenda chumbani nikachukua tochi yangu ya mawe sita, nikatoka chumbani na kwenda stoo kuchukua shepe.

 

Nikiwa nimeshika shepe na tochi nilitoka nje nikafungua boneti la nyuma la teksi yangu na kuliweka lile shepe pamoja na tochi kisha nikalifunga boneti.

 

Nilikwenda kwenye mlango wa dereva nikajipakia na kuiondoa teksi.

 

Eneo la makaburi halikuwa mbali sana na mtaa niliokuwa ninaishi pale Msambweni. Nikaiendesha teksi taratibu hadi katika eneo hilo la makaburi. Niliingiza teksi ndani kabisa ili isionekane mahali hapo. Nilikuwa nimezima taa za mbele na za nyuma.

 

Nilipofika mahali nilipopataka niliisimamisha teksi nikafungua mlango na kushuka. Nilikwenda nyuma ya teksi nikafungua boneti na kutoa shepe pamoja na tochi. Nikawwa natafuta mahali pa kuchimba kaburi ili niizike ile maiti ya Halima nipoteze ushahidi.

 

Baada ya kumulikamulika tochi nilipata sehemu nzuri ambayo haikuwa na kaburi. Nikatazama huku na huku, nilipoona kulikuwa kimya nikaanza kuchimba.

 

Mchanga ulikuwa mgumu lakini nilijitahidi hivyohivyo, jasho likawa linanitoka. Nilipochoka nilipumzika kwenye gari kisha nikarudi tena kuendelea kuchimba. Nilichimba hadi nikapata shimo la kutosha. Nikaliweka shepe chini nikaenda kwenye teksi na kuutoa mwili wa Halima.

 

Sikuwa na nguvu za kuubeba kwa vile nguvu nyingi nilizitumia kuchimba kaburi hilo. Niliuweka chini kisha nikauburuza kuelekea kwenye lile kaburi. Nilipolifikia nikausukumia ndani ya kaburi hilo.

 

Ulivyoangukia ndivyo hivyo hivyo nilivyoufukia. Sikuwa na muda wa kuingia ndani ya kaburi hilo na kuuweka sawa.

 

Nilipomaliza kufukia nilisawazisha mchanga na kuushindiliankwa miguu. Wakati nafanya hivyo niliona kama kulikuwa na mtu nyuma ya mti uliokuwa ubavuni kwangu akinichungulia. Nikashituka!.

 

Niliinama chini nikaichukua ile tochi na kumulika pale kwenye mti. Ule uso uliokuwa ukinichungulia ulipoona mwanga ulijificha nyuma ya mti.

 

Nikapata hofu na wasiwasi kwa sababu sikujua mtu yule alikuwa nani na kama alikuwa akinifuatilia mimi.

 

Nilijiambia kama mtu huyo alikuwa ananifuatilia mimi atakuwa ameshgundua siri yangu na ilikuwa si siri tena.

 

Dukuduku la kutaka kumjua likanipata. Nilitaka nijue kama ni mtu niliyekuwa namfahamu au yeye ananifahamu mimi.

 

Nikalishika lile shepe kama silaha yangu na kunyemelea kunako ule mti huku nikiendelea kumulika tochi.

 

Nilinyemelea kuuzunguka ule mti nikiuambaa kwa mbali kwa kuhofia kushambuliwa ghafla kwani sikuwa nikijua aliyekuwa nyuma ya mti huo alikuwa nani.

 

Nilipozunguka nusu tu ya mti huo nikamuona mtu amechutama chini ya mti huo. Nikammulika kwa tochi ili niweze kumuona vizuri. Nilimuona alikuwa msichana na alikuwa uchi wa mnyama! Nguo zake alikuwa amezishika mkononi akikinga uso wake usimulikwe.

 

Kitendo cha kumuona msichana yule mahali pale na usiku ule tena akiwa uchi, kwa kweli kilinitisha. Maswali mawili yakanijia.

 

Alikuwa nani?

 

Alikuwa akinichunguza mimi au alikuwa na lake?

 

Sikutosheka kujiuliza peke yangu kwa sababu nisingepata jibu, nikaikaza sauti yangu na kumuuliza.

 

“Wewe nani?”

 

“Zima tochi kwanza!” akaniambia. Sauti yake ilikuwa ya chini lakini ilikuwa ya ukali.

 

Nikazima ile tochi lakini mwanga wa mbalamwezi ulitosha kuyafanya macho yangu yamuone.

 

Alipoona nimezima tochi alisimama akavaa nguo zake haraka haraka huku akiniambia “Subiri hapo hapo”

 

Alipomaliza kuvaa akaniambia.

 

“Samahani kaka yangu, mimi nilikuwa na ishu yangu hapa ndiyo nikakuona wewe unafukia hilo kaburi. Nadhani wewe pia ulikuwa na ishu yako. Sote ni wachawi, tusidhuriane”

 

Sote ni wachawi? Ina maana yeye ni mchawi? Nikajiuliza.

 

“Ulikuwa na ishu yako ipi?”

 

“Kaka usiwe na wasiwasi na mimi. Mimi nilikuja kuzika vitu vyangu kwenye kaburi”

 

“Vitu?”

 

“Ndiyo vitu”

 

“Vitu gani?”

 

“Ni vitu vya uganga. Nilipewa na mganga wangu. Aliniambia nije nivizike usiku kwenye kaburi”

 

“Wewe ni mchawi?”

 

“Hapana, si mchawi”

 

“Mbona umeniambia sote ni wachawi tusidhuriane”

 

“Nimekwambia hivyo kwa maana tunavyovifanya hapa ni vitendo vya kichawi vya kufukua makaburi usiku”

 

“Hivyo vitu ulivyozika vinahusu nini?”

 

“Ni mambo yangu binafsi”

 

“Kwa hiyo huna tatizo jingine?’

 

Msichana akabetua mabega.

 

“Mimi sina tatizo, ni wasiwasi wako tu”

 

Nikamsogelea karibu na kumuuliza.

 

“Hivyo vitu umevizika kwenye kaburi gani?”

 

Akanionesha kaburi lililokuwa upande wa pili pembeni mwa ule mti.

 

Wakati nalitazama hilo kaburi aliniuliza.

 

Je alimuuliza nini n nini kitatokea? Usikose kuendelea na hadithi hii kesho.