NILIJUA NIMEUA SEHEMU YA (7)

HADITHI hii inaletwa kwenu kwa hisani kubwa ya kituo cha Tiba Asilia (Mkombozi Sanitarium Clinic) mabingwa wa tiba na magonjwa yaliyoshindikana. Kituo kiko na mashine za kupima mwili mzima na kugundua magonjwa yaliyofichikana. Kituo kipo Chuda Tanga mkabala na Raha Leo Transport, simu 0654 361333

 

NILIJUA NIMEUA (7)

 

ILIPOISHIA

 

Baada ya kupelekwa wodini Dk Kweka aliniita, nikaenda wodini na kumuona mke wangu. Hali aliyokuwa nayo wakati anapelekwa kufanyiwa usafishwaji, siyo aliyokuwa nayo wakati ametolewa. Alikuwa na afadhali sana.

 

Nikamshukuru Dk Kweka nay eye akanishukuru pia.

 

“Unaweza kurudi naye nyumbani” akaniambia.

 

“Tatizo lake limekwisha kabisa?” nikamuuliza.

 

“Limekwisha isipokuwa kila wiki umlete kuangalia maendeleo yake”

 

“Lilikuwa ni tatizo gani?”

 

“Mimba ilikuwa haikushika sawa sawa. Ana udhaifu kwenye kizazi chake. Katika hali kama hiyo anapopata mshituko, hofu au fadhaa, mara moja mimba inaweza kutoka”

 

Nikahisi ile ndoto aliyoota ndiyo iliyomshitua na kusababisha mimba hiyo kuporomoka.

 

“Asante dokta, sasa unatushauri nini?”

 

“Kama nilivyokwambia kila wiki mlete hapa hospitali, nione maendeleo yake”

 

“Sawa dokta, nitafanya hivyo”

 

SASA ENDELEA

 

Baada ya hapo niliondoka na mke wangu tukarudi nyumbani. Kila wiki nikawa nampeleka hospitali kufanyiwa uchunguzi na Dk Kweka. Wiki nyingine ambazo sikuwa na nafasi alikuwa akienda mwenyewe.

 

Zoezi hilo lilichukua wiki sita ndipo tukaacha kwenda hospitali. Dk Kweka akanihakikishia kuwa tatizo la mke wangu halikuwepo tena.

 

“Kama unataka mimba nyingine kazi kwako” Dk Kweka akaniambia kwa utani.

 

“Asante sana. Kwa kweli ninakushukuru kwa msaada wako” nikamwambia.

 

Siku moja ambayo sitaisahau maishani mwangu nilikuwa kwenye kiwanja cha ndege cha Tanga. Kulikuwa na ndege ya abiria iliyotua kutoka Zanzibar.

 

Nikapata abiria mmoja ambaye alivutia sana hisia zangu. Alikuwa ni kijana ambaye nilisoma naye katika shule ya sekondari ya Usagara. Mimi nilikomea kidato cha nne, yeye alifanikiwa kuendelea kidato cha tano na cha sita. Alikuwa anaitwa Zacharia.

 

Tangu tulipoondoka shule hatukukutana tena hadi siku ile. Miaka minane ilikuwa imeshapita. Mbali ya kufurahi kumuona pia alinishitua, kwanza kumuona akishuka kwenye ndege na kwa jinsi alivyokuwa amevaa na kupendeza.

 

Alikuwa amevaa suti nyeusi. Koti lake alikuwa amelivua na kulipachika begani. Ndani ya suti kulikuwa na shati jeupe na tai yangi nyekundu. Uso wake uliokuwa umenawiri ulionesha mwenzangu alitoka kwenye neema

 

Kukutana kwangu na Zacharia baada ya kufarakana kwa karibu miaka minane kulikuwa ndio mwanzo wa masahibu niliyokutana nayo amabayo sitayasahau kamwe.

 

“Oh Machawi! Habari za siku?’ Hivyo ndivyo Zacharia alivyonisalimia huku akinipa mkono mara tu aliponiona ndani ya jengo la kiwanja cha ndege.

 

Machawi lilikuwa jina langu la utani ambalo vijana wenzangu walikuwa wakiniita shuleni. Walianza kuniita mchawi kwa sababu nilikuwa na tabia ya kutoroka toroka shule. Naweza kuonekana msitarini lakini wanafunzi wakiingia darasani hawanioni! Nimeshatoroka. Nikaitwa mchawi. Baadaye jina hilo likabadilika likawa Machawi.

 

“Nzuri Zacharia. Kumbe unaishi Zanzibar?”

 

“Nilienda kwa muda, niko Dar”

 

“Kikazi uko wapi?”

 

“Baada ya kuchukua shahada yangu ya sheria niliajiriwa na Wizara ya mambo ya nje”

 

“Nimefurahi kukuona, karibu tena Tanga”

 

“Asante. Nahitaji teksi ya kunipeleka mjini”

 

“Mimi pia ni dereva wa teksi. Hapa nimefuata abiria”

 

“Kumbe unaendesha teksi! Vizuri sana. Basi twenzetu”

 

Nikatoka naye. Mara tu baada ya kujipakia kwenye teksi mazungumzo yakaanza.

 

“Ajira zimekuwa ngumu sana. Nimeangukia kwenye udereva” nilimwambia Zacharia wakati nikiiwasha teksi.

 

“Kwa sasa hivi sekta binafsi ndio kimbilio la watu wengi. Hata mimi kuna uwezekano mkubwa nikaacha kazi na kujiajiri mwenyewe”

 

“Wewe mwenzetu una shahada yako ya sheria, unaweza kujiajiri mwenyewe. Taabu ni kwetu sisi tulioishia sekondari”

 

“Hapana. Ajira ni ajira tu. Hata kuendesha teksi ni ajira, ilimradi tu unapata riziki yako na maisha yanakwenda. Kwani teksi ni ya kwako mwenyewe?”

 

“Hapana si yangu”

 

“Lakini masilahi yapo”

 

“Nashukuru, si sawa na kukosa kabisa”

 

“Mimi nataka kuwa wakili wa kujitegemea. Nitakuja kufanya kazi zangu hapa Tanga”

 

“Itakuwa vizuri sana. Huduma ya uwakili inahitajika sana na katika mkoa wetu  tuna mawakili wachache sana”

 

“Pengine mwakani nitakuwa nimeshapata leseni”

 

“Nakuombea mafanikio. Unakwenda wapi?”

 

“Mtendele Hotel”

 

“Pale Chuda?”

 

“Ndiyo Chuda. Nitakuwa pale kwa wiki moja hivi”

 

“Zanzibar ulifuata nini?”

 

“Nilienda kikazi”

 

‘Tulifika Mtendele Hotel. Wakati anashuka alinikaribisha. Na mimi nikashuka na kumfuata.

 

“Hatuwezi kuachana haraka. Hatujakutana miaka mingi” aliniambia wakati tunapenya katika lango la hoteli hiyo mpya.

 

Wakati anaandikisha chumba aliniambia nikae kwenye kiti, akaniagizia bia.

 

Alipopatiwa chumba alirudi tukaakaa sote. Na yeye akaagiza bia. Tulikunywa huku tunazungumza hadi nikakata chupa nne. Baada ya kulipia bia tulizokunywa alinipa shilingi laki mbili.

 

“Chukua hizo rafiki yangu” akaniambia. Nikamshukuru sana.

 

“Nipatie namba yako ya simu ili kama nitahitaji teksi nikuite” akaniambia.

 

“Sawa”

 

Nikampa namba yangu na yeye akanipa yake. Tukaagana na nikamuacha hapo hoteli.

 Usiptwe na uhondo huu kesho nini kitatokea ni hapahapa tangakumekuchablog