HADITHI SEHEMU YA (10)

Hadithi hii inaletwa kwenu kwa hisani kubwa na Mkombozi Sanitarium Clinic, Mabingwa wa magonjwa sugu na yaliyoshindikana. Mkombozi wako na mashine za kisasa za kugundua magonjwa mwili mzima na kutoa tiba ya uhakika. Mkombozi ni kituo cha kisasa chenye Madaktari waliobobea. Kituo kipo Tanga mtaa wa Chuda mkabala na Kampuni ya mabasi ya Raha Leo, simu 0654 361333

 

ILIPOISHIA

 

“Ni mambo yangu binafsi”

 

“Kwa hiyo huna tatizo jingine?’

 

Msichana akabetua mabega.

 

“Mimi sina tatizo, ni wasiwasi wako tu”

 

Nikamsogelea karibu na kumuuliza.

 

“Hivyo vitu umevizika kwenye kaburi gani?”

 

Akanionesha kaburi lililokuwa upande wa pili pembeni mwa ule mti.

 

Wakati nalitazama hilo kaburi aliniuliza.

 

SASA ENDELEA

 

“Je wewe mwenzangu ulikuwa unafanyaje?”

 

“Kwani hukuniona?’

 

“Wakati ninakuja hapa, nilikukuta unafukia lile kaburi”

 

“Mimi pia nilizika vitu nilivyopewa na mganga” nikamdanganya.

 

“Mbona umetumia shepe?”

 

“Kwani wewe umechimba na nini?”

 

“Kwa mkono, shimo dogo tu”

 

“Mimi nilizika vitu vingi, ilibidi nifukue kwa shepe”

 

“Sawa. Nimekuelewa”

 

“Kwanini ulivua nguo?”

 

“Ndivyo nilivyoagizwa na mganga”

 

“Kweli kila uganga una namna zake”

 

“Haya mimi naenda zangu”

 

Sikupenda kuachana na yule msichana mara moja, nikamuuliza.

 

“Unaishi wapi?”

 

“Ninaishi Mabawa”

 

Eneo alilolitaja ni jirani na eneo la Msambweni.

 

“Mimi nimeshamaliza, twende nikupeleke”

 

“Nitashukuru sana kakangu”

 

Tukaenda kwenye teksi, nikaliweka shepe pamoja na tochi nyuma ya boneti kisha tukajipakia. Niliiwasha teksi nikarudi kinyumenyume bila kuwasha taa.

 

 

 

Nilipotokea barabarani nikawasha taa za teksi na kukanyaga mafuta.

 

“Unaishi sehemu gani?” nikamuuliza yule msichana wakati teksi ikiwa katika mwendo.

 

Akanielekeza mtaa aliokuwa anaishi.

 

“Unafanya kazi au upo nyumbani?” nikamuuliza.

 

“Nafanya biashara zangu tu”

 

Sikumuuliza kitu tena hadi nilipomfikisha nyumbani kwake. Nilimuacha anabisha mlango, nikaondoka. Kusema kweli alikuwa msichana asiye na uoga. Usiku kama ule aliweza kwenda makaburini akiwa pake yake akavua nguo na kuzika vitu kwenye kaburi! Nilimsifu kimoyomoyo kuwa alikuwa jasiri.

 

Wakati ninarudi nyumbani nilipanga kutomuelezea mtu yeyote kuhusu kifo cha mke wangu.

 

Nilijiambia mtu yeyote atakayeniuliza nimwambie kuwa Halima amekwenda Pongwe kuwasalimia wazazi wake. Zikipita siku tatu na mimi niende Pongwe, nizuge kwamba nimemfuata Halima. Nitakapomkosa niende polisi kuripoti kuwa mke wangu amenitoroka.

 

Dakika chache baadaye nikawasili nyumbani kwangu na kupatwa na mshituko nilipokuta mlango wa nyumbani uko wazi. Nikajiuliza kama nilisahau kuufunga wakati nilipoondoka.

 

Nikashuka kwenye teksi na kupiga hatua kuelekea mlangoni. Nilipoufikia mlango huo nilisikia hatua za mtu akitembea humo ndani.

 

Nikajiuliza ni nani aliyeingia ndani ya nyumba yangu, mwenyewe nikiwa sipo? Kitendo hicho kilikuwa kimenishitua na kunipa taharuki lakini nilijikaza kiume. Kwa vile ilikuwa ni nyumba yangu nikaingia.

 

Nikasimama kwenye sebule na kuuliza kwa sauti ya juu.

 

“Nani ameingia humu ndani?”

 

“Shemeji!” nikasikia sauti ya mwanamke ikitokea uani. Kisha nikamuona mwanamke mwenyewe. Kwa vile nilikuwa nimesimama usawa wa mlango wa uani, na yeye aliniona.

 

“Shemeji! Akatamka tena huku akinifuata.

 

Nilipomtazama vizuri nikamgundua. Alikuwa ni Rita, dada yake marehemu mke wangu. Udugu wao ulikuwa ni wa shangazi kwa mjomba.

 

Nilipooana na Halima yeye ndiye aliyekuwa mstari wa mbele kusimamia harusi yetu.

 

“Oh kumbe ni wewe shemeji!” nikamwambia na kumuuliza “Umekuja saa ngapi?”

 

“Nimekuja sasa hivi, nikakuta mlango upo wazi. Naingia ndani sikuti mtu”

 

“Ah nilikuwa nimetoka mara moja, nilisahau kufunga mlango”

 

“Huogopi waizi?”

 

“Nilisahau tu, si unajua mambo ni mengi kichwani”

 

“Eh shauri yenu, mtakuja lia kilio cha m’bwa!. Yuko wapi mwenzako?”

 

ITAENDELEA kesho na usikose nini kitajiri hapahapa tangakumekuchablog