MKURUGENZI WA HABARI NA MAELEZO AWAPA BARAKA BLOGGERS (TBN)

 Mkurugenzi wa habari na Maelezo, Dr, Hassan Abass, akifungua mkutano mkuu wa mwaka wa waendeshaji mitandao ya kijamii (TBN), kushoto ni Mwenyekiti wa Tanzania Bloggers Network- TBN, Joaqim Mushi.

Tangakumekuchablog

Dar es Salaam, MKURUGENZI wa habari na Maelezo, Hassan Abass, amewataka waendeshaji wa mitandao ya kijamii (bloggers) kuheshimu misingi ya taaluma ya  upashaji habari.

Akizungumza katika kongamano kwa wanachama wa mitandao ya kijamii (TBN), Abbass ameitaka mitandao hiyo kuhakikisha habari zao zinasaidia jamii katika nyanja mbalimbali za afya , elimu na mazingira.

Alisema mitandao ya kijamii iko na umuhimu mkubwa kwa jamii hivyo kuwataka kuhakikisha habari zao zinakuwa za ukweli na weledi jambo ambalo litaweza kuisaidia jamii.

“Nimefurahi kukutana na waendeshaji mitandao ya kijamii natambua kuwa muko na mchango mkubwa kwa jamii na Serikali hivyo fanyeni kazi zenu kwa weledi” alisema Abass

Alisema ili kufanya kazi kwa weledi ni vyema kuongeza elimu lengo likiwa ni kufanya kazi kwa umakini na umahiri na kuleta changamoto za upashanaji wa habari.

Awali akizungumza katika mkutano huo, mwenyekiti wa Mtandao wa kijamii (TBN) , Joaqim Mushi, alisema mitandao ya kijamii imekuwa katika nafasi kubwa ya upatikanaji wa habari kwa wakati.

Alisema mitandao ya kijamii imekuwa na changamoto nyingi za upatikanaji wa habari hivyo kutaka kila Mkoa kwenye shughuli za kitaifa kupewa nafasi.

   “Kupitia kongamano hili naiomba Serikali kuitambua mitandao ya kijamii na kupewa nafasi katika shughuli za kitaifa, hii itasaidia jamii kupata habari” alisema Mushi

Mushi aliwataka waendeshaji mitandao ya kijamii kujikita katika habari za vijijini ambako kuna changamoto nyingi zikiwemo za kilimo na ukosefu wa huduma za kijamii ikiwemo maji.

                                                    Mwisho