HADITHI, YAMENIKUTA SAMLA MIE SEHEMU YA 27

HADITHI

 

YAMENIKUTA SALMA MIE

 

ILIPOISHIA

 

Aliponiambia hivyo nilishituka kidogo kwa sababu nilihisi Ibrahim akisikia kumeingia ujumbe kwenye simu yangu anaweza kumpa Zacharia amsomee na hivyo kugundua mipango yangu.Lakini nikasema potelea mbali liwalo na liwe. Kuondoka ni lazima niondoke na Chinga.

 

“Siwezi kujilazimisha kuendelea kuishi na mwanaume ambaye simtaki” nikajiambia kimoyomoyo.

 

Chinga akaniambia tuingie kwenye basi ambalo lilikuwa karibu na mahali tulipokuwa tumesimama. Tukajipakia kwenye basi hilo la kampuni ya Rahaleo.Tulitafuta siti zetu, tulipoziona tuliweka masanduku yetu kwenye kifaa cha kuwekea mizigo. Tukaketi.

 

Vile tunaketi tu niliona mtu ambaye sikumtarajia akiingia ndani ya basi hilo, mkono mmoja akiwa ameshika bakora yake na mkono mwingine ameshikwa na kijana ambaye bila shaka ndiye aliyemleta hapo stendi.

 

Alikuwa Ibrahim!

 

Moyo wangu ulishituka. Furaha niliyokuwa nayo yote ikanipotea. Nikabaki kumtazama kuona alikuwa anataka kufanya nini.

Nilishajua kuwa alinifuata mimi baada ya kuugundua ule ujumbe niliotumiwa na Chinga ambao ulimtambulisha kuwa nilikuwa nimetoroka kwake na nilikuwa ninasafiri na mwanaume kwenda Dar er salaam kwa basi la Rahaleo.

 

Mabasi ya Rahaleo yalikuwa yakifanya safari zake Da er salaam na Tanga.

 

Hata kama Chinga hakuandika kuwa tunakwenda Dar lakini kwa vile alitaja basi la Rahaleo, Ibrahim alishajua kuwa tunakwenda Dar. Bila shaka baada ya Zacharia kumsomea ujumbe huo wa Chinga kwenye simu yangu, Ibrahim alimwaambia aangalie kwenye kabati ambako waliona nilikuwa nimechukua nguo zangu zote muhimu na vitu vyangu vyote.

 

SASA ENDELEA

 

Hapo ndipo Ibrahim alipotaharuki na kukurupuka akaamua kunifuata stendi. Sikujua ni kwanini aliletwa na kijana mwingine badala ya Zacharia lakini nilipata jibu kuwa huenda ni kijana wa bodaboda aliyoikodi.

 

Chinga hakuwa ameshituka. Kwanza alikuwa hamjui Ibrahim. Pengine alipomuona alidhani ni miongoni mwa abiria wa basi hilo, isitoshe alichokuwa anakijua Chinga ni kuwa nilikuwa nimeshaachana naye na nilikuwa nimehamia kwa shangazi yangu.

 

Sasa sijui itakuwaje? Nikawaza. Hata hivyo nilipata moyo kidogo kwa sababu Ibrahim mwenyewe asingeweza kuniona kwa vile haoni na kijana aliyekuja naye alikuwa hanijui.

 

Nikatulia kimya kwenye siti huku nikizungumza na Chinga kama vile huyo mtu aliyeingia nilikuwa simjui.

 

Ibrahim alipoingia ndani ya basi hilo alisimama kando ya mlango akauliza. 

 

“Salma, umo ndani ya basi hili?”

 

Chinga akashituka wakati Ibrahim alipolitaja jina hilo . Mimi nikanyamaza kimya.

 

“Anamuuliza nani?” Chinga akaniuliza kwa sauti ya chini.

 

Nikamjibu  “Sijui”.

 

Ibrahim akauliza tena.

 

“Jamani namtafuta mke wangu anayeitwa Salma. Kama yumo ndani ya basi hili naomba anijibu”

 

Chinga akanitazama. Bila shaka alikwisha gundua kuwa yule ni mume wangu na Salma anayemtafuta ni mimi.Lakini aliponitazama hakuniambia kitu, akageuza uso wake kumuangailia Ibrahim.

 

“Jamani mnaulizwa kuna mtu anayeitwa Salma mke wa huyu bwana?” abiria mmoja akamsaidia Ibrahim kuuliza baada ya kuona watu wako kimya.

 

Abiria wakawa wanatazamana. Kila mtu akamtazama mwenzake. Kwa bahati wanawake tulikuwa wengi humo ndani ya basi, kwa hiyo hakukuwa na aliyenitilia shaka.

 

Yule abiria aliyemsaidia Ibrahim kuuliza akamwaambia “Naona hayumo”

 

“Kwani hili si ndilo basi la Rahaleo au kuna jingine?” Ibrahim akauliza

 

“Liko jingine lakini limeshaondoka.Labda alikuwa kwenye basi hilo ” Ibrahim akajibiwa.

 

Hapo nikaona uso wa Ibrahim ukisambaratika na kuonekana kama aliyetaka kulia.Laiti ningekuwa na moyo wa kibinaadamu ningemhurumia na pengine ningebadili mawazo ya kumkimbia.

Lakini ibilisi alikuwa amesha nishika sawasawa. Nilimuona Ibrahim kama shetani aliyekuwa anataka kuzuia mafanikio yangu.

 

Ibrahim akageuka ili atoke ndani ya basi. Nikaona mistari ya machozi ikitokeza chini ya miwani aliyokuwa amevaa.

 

Nilimchungulia Ibrahim kwenye dirisha wakati aliposhuka ndani ya basi. Kijana aliyekuwa amemshika mkono alikuwa akienda naye mahali alipoiegesha pikipiki yake.

 

“Imekuwaje Salma?” Chinga akaniuliza.

 

“Imekuwaje nini?” nikamuuliza ingawa nilishajua alichokusudia.

 

“Huwezi kunidanganya, huyu jamaa ndiye mume wako na alikuwa anakuuliza wewe”

 

Nilibetua mabega  “Aka! Si tumekwisha achana. Atakuwaje mume wangu?”

 

“Sasa kama mmeachana mbona anakufuata?”

 

“Ni usumbufu tu, labda anataka kunibembeleza nirudi lakini mimi sitarudi tena kwake”

 

“Na amejuaje kuwa unasafiri?”

 

Hapo sikuwa na jibu, nikamwaambia. 

 

“Atajua mwenyewe, mimi sijui. Labda ameambiwa na shoga yangu Rita. Rita naye kwa umbeya hawezekani!”

 

Wakati namuambia hivyo basi lilipigwa moto na kuanza kuunguruma kwa sekunde chache kabla ya kuondoka.

 

Tulifika Dar er salaama saa sita mchana. Tukiwa katika kituo cha mabasi cha Ubungo, Chinga alikodi taksi iliyotupeleka Sinza.

Nikamuuliza Chinga kwanini tunakwenda Sinza wakati  aliniambia nyumba yake iko Masaki.

 

“Nina nyumba mbili, moja iko Sinza na moja Masaki” Chinga akanijibu.

 

Tulipofika Sinza niliiona nyumba ya Chinga. Ilikuwa nyumba ya kawaida tu. Chinga akaniambia nyumba yake iliyokuwa Masaki ndiyo ya thamani zaidi.

 

“Tutaanzia maisha hapa. Nikikuona una upendo wa dhati nitakuhamishia kwenye nyumba yangu ya Masaki” Chinga akaniambia.

 

“Kwani umenionaje?” nikamuuliza.

 

“Sijaishi na wewe, siwezi kukujua kwa undani”

 

“Upendo umo ndani ya moyo wangu. Kama sina upendo na wewe nisingemuacha mume wangu kwa ajili yako”

 

“Sasa ndiyo uuoneshe na mimi niuthibitishe”

 

Tulikuwa tumeshaingia ndani ambako tulimkuta kijana ambaye Chinga aliniambia kuwa ni mkazi wa nyumba ya jirani anaye muachia nyumba anaposafiri.

 

Sebuleni palikuwa na fanicha za thamani. Chinga alinitembeza nyumba nzima akanionesha kila kitu. Chumba chake cha kulala kilikuwa chenye hadhi hasa, siyo kama kile nilichokuwa ninalala na Ibrahim. Kwa jumla nilifurahia kuanza maisha mapya nikiwa na mwanaume tofauti. Sikumfikiria tena Ibrahim wala sikumkumbuka.

 

Niliishi na Chinga kama mke na mume ingawa hatukulizungumzia tena suala la ndoa. Mimi sikutaka kulizungumza kwa sababu nilijijua kuwa bado nilikuwa mke wa Ibrahim na Chinga hakulizungumza labda kwa sababu alitaka tuishi kwanza ili tupimane tabia.

 

Wiki moja baada ya kuanza maisha Chinga alininunulia simu nyingine mpya ya bei mbaya. Pia alinifanyia shopping ya karibu nusu milioni. Akaniambia zile nguo nilizotoka nazo Tanga nisizitumie tena kwa sababu haziendani na Jiji la Dar. Viwalo alivyoninunulia vilikuwa ni vya fasheni za kisasa za kisichana. Sikumbuki lile baibui langu nililitupia wapi.

 

Kila wiki tulikuwa tunatoka mara mbili kwenda kwenye matanuzi. Kumbi zote za starehe za Dar sasa nilikuwa ninazifahamu. Hakukuwa na mahali ambako sikupajua. Chinga alinifundisha ulevi nikawa mlevi wa kupindukia. Friji letu halikukosa kuwa na bia kila siku.

 

Chinga alinitambulisha kwa marafiki zake mbalimbali waliokuwa wakifanya biashara pamoja. Niliwazingatia marafiki zake wanne Frenk, Steven, Jonathan na Mussa. Mara kwa mara watu hao walikuwa wanakuja nyumbani na kufanya mazungumzo lakini Chinga hakutaka nisikilize mazungumzo yao .

 

Kuna siku walikuwa wakileta nyumbani vitu vya thamani kama TV na Friji na vitu vingine ambavyo Chinga aliniambia vilitoka bandarini na baada ya siku mbili tatu huvipeleka kwa wateja wao.

 

Kadiri siku zilivyokwenda Chinga alianzisha tabia mabayo sikuwa nikiipendelea. Kuna siku ambazo hutoka na mimi lakini kuna siku ambazo hutoka peke yake na kurudi usiku wa manane. Siku nyingine anarudi siku ya pili yake tena mchana.

 

Kila ninapomuuliza hutoa sababu mpya. Kuna siku anazoniambia amelala nje ya Jiji kuitokana na kazi zake za biashara na kuna siku ambazo huniambia amechelewa kurudi nyumbani kwa sababu alikuwa na mikutano na wafanyabiashara wenzake.

 

Pale ninapoonesha kukasirika kwa kumshuku kuwa ana wasichana wengine, Chinga alikuwa hodari wa kunibembeleza na kujitakasa kwamba hakuwa na msichana yeyote wa nje. Nikawa sina budi nikubaliane naye.

 

Ilipita miezi minne. Kuna siku Chinga aliniaga kuwa anakwenda Tanga kumsalimia baba yake na kuchukua gari lake. Aliniachia pesa za kutosha na ndani ya nyumba kulikuwa na kila kitu. Nakumbuka aliondoka asubuhi. Ilipofika jioni wakati nimeketi sebuleni nikiangalia tv nikasikia gari likasimama huko nje.

 

Nilipochungulia kwenye dirisha niliona teksi imesimama mbele ya mlango. Nikaona msichana anashuka. Alionekana kama anatoka safari kwani dereva alimteremshia masanduku mawili.

 

Teksi ikaondoka.Yule msichana akaja kubisha mlango. Nikanyanyuka na kwenda kumfungulia.

 

“Hujambo?” akaniuliza.

 

“Sijambo, karibu”

 

ITAENDELEA kesho nini kitatokea na huyu msichana ni nani tukutane kesho  hapahapa tangakumekuchablog