ALIYEMUUA MCHUMBWA WANGU SEHEMU YA 16

HADITHI

 

ALIYEMUUA MCHUMBA WANGU 16

 

ILIPOISHIA

 

Dokta Kweka akampa mkono Simon kabla ya kunyanyuka.

 

“Nadhani tumemaliza, nione matokeo baada ya siku tatu”

 

“Utayaona”

 

Simon naye akanyanyuka.

 

Siku iliyofuatia Simon aliingia baa ya ABC ya Kimara saa kumi na moja jioni, akanywa bia hadi saa moja usiku ambako aliondoka kuelekea Kinondoni. Alisimamisha gari mbele ya nyumba ya Maria akatulia kwenye siti kama ambaye alikuwa akimsubiri mtu.

 

Baada ya kupita dakika tano hivi alifungua mlango akashuka alikwenda kwenye mlango wa nyumba ya Maria akaujaribu na kuona haukuwa umefungwa kwa ndani, Akaufungua na kuingia ndani. Alitupa macho sebuleni, hapakuwa na mtu.

 

Maria alikuwa chumbani akivaa baada ya kuoga. Simon aligonga mlango wa chumba cha Maria. Maria alifungua mlango. Alipomuona Simon alishituka akaufunga. Alichukua simu akamtumia ujumbe James.

 

“James njoo haraka, yule mtu amekuja!”

 

Alipotuma ujumbe huo alifungua mlango. Hakutambua dhamiri ya mtu huyo ilikuwa nini.

 

“Unasemaje?” akamuuliza bila kutoka sebulani.

 

Ndipo Simon alipojipenyeza mle chumbani kwa nguvu.

 

SASA ENDELEA

 

“Unataka nini?” Maria alimuuliza huku akimpigia simu James.

 

“Nataka roho yako. Nilikuwa nakutafuta sana na nimethibitisha kuwa ni wewe ninayekutaka”

 

Simon akatoa bastola aliyokuwa ameificha ndani ya koti. James alikuwa ameshapokea simu ya Maria. Lakini Maria hakuweza kumueleza lolote kwani Simon alimnyang’anya ile simu kisha akampiga risasi ya kifua, mahali ambapo Simon alikuwa na hakika kuwa Maria asingeweza kupona.

 

Akatoka. Wakati anatoka James alikuwa anawasili na gari akamuona.

 

James alishuka na kumfuata. Simon akawahi kuliondoa gari na kuondoka kwa kasi. James akakimbilia kwenye mlango wa nyumba ya Maria ambao aliukuta uko wazi. Akaingia ndani.

 

Kwenye sebule hakukuwa na mtu. James akasimama na kuita.

 

“Maria!

 

Hakukuwa na jibu, nyumba ilikuwa kimya. James alikwenda kwenye mlango wa chumba cha Maria akausukuma na kuingia ndani.

 

Alichokutana nacho kilimfanya atoe macho na kuacha mdomo wazi. Maria alikuwa amelala chini, damu nyembamba ilikuwa ikimtoka kifuani na kuchirizika hadi sakafuni. James alichutama na kumuinua upande wa kichwani.

 

Maria alikuwa akipumua kwa taabu.

 

“Maria umepatwa na nini?” James akamuuliza kwa sauti iliyotaharuki.

 

Maria alijitahidi kuinua mdomo akatamka kwa taabu.

 

“Pascal…Pascal…amenipiga risasi…ameniambia alikuwa akinitafuta sana na amethibitisha kuwa ni mimi…”

 

“Amekupiga risasi kwa kosa gani lakini…?”

 

 

Nguvu zilikuwa zimemuishia Maria. Hakuweza kutamka tena. Akaguna na kufumba macho.

 

“Maria…Maria…!” James akamuita huku machozi yakimtoka.

 

Maria alikuwa kimya.

 

“Maria!” James alimuita kwa sauti ya juu huku akimtikisa.

 

Maria alikuwa kama hakuwepo tena. Uliokuwepo pale ulikuwa ni mwili mtupu usio na uhai….

 

                              ************

 

Simon alilikimbiza gari kutoka nyumbani kwa Maria hadi kwenye mkahawa wa Afrique ambako Dokta kweka kila saa mbili usiku hufika kupata chakula.

 

Alilisimmisha gari mbele ya jengo hilo lililokuwa na mkahawa, akapanda ghorofa ya kwanza ulikokuwa mkahawa huo. Kwa vile Dokta Kweka mwenyewe alimthibitishia kuwa atakuwa hapo, alimkuta amemaliza kula chakula. Alikuwa akinywa juisi.

 

Simon alikaa kwenye kiti.

 

Dokta Kweka aliinua macho yake akamtazama Simon na kumuuliza “Je?”

 

“Tayari” Simon akamjibu.

 

“Tayari nini?”

 

“Nimekamilisha kazi”

 

“Unaniambia ukweli Simon?”

 

“Kesho utapata habari yote kwenye vyombo vya habari”

 

“Umemuuaje”

 

“Nimempiga risasi”

 

“Akiwa wapi?”

 

“Nyumbani kwake”

 

“Umehakikisha kuwa amekufa sawa sawa?”

 

“Nimempiga risasi ya kifua, hawezi kupona”

 

“Vizuri. Tukutane hapa hapa kesho saa tatu asubuhi tumalizane. Na nitakuwa nimeshathibitisha ukweli wako. Sawa?”

 

“Sawa”

 

Simon aliondoka na kwenda nyumbani kwake Temeke. Aliliingiza gari lake ndani ya banda, akaenda kuketi sebuleni.

 

“Unaonekana umechoka unatoka wapi?” mke wake akamuuliza huku akiketi kando yake.

 

“Ni kweli mke wangu, natoka Kibaha nilikuwa na mipango ya kazi” Simon alimdanganya mke wake.

 

“Nikuwekee chakula au utakwenda kuoga kwanza?”

 

“Niwekee. Nahitaji kula na kupumzika”

 

Vicky, mke wa Simon alinyanyuka na kuelekea jikoni. Simon alikuwa akimtazama kwa nyuma wakati anaondoka.

 

Alijivunia sana kufanikiwa kumuoa msichana huyo ambaye alimsumbua kwa muda mrefu. Ingawa ndoa yao ilikuwa na miezi michache tu, alishagundua kuwa msichana huyo aliyemtoa shamba alikuwa ni mmoja wa wasichana wachache duniani wenye vipaji vya kuzaliwa katika mapenzi na kumuenzi mume.

 

Mwenyewe alikiri kimoyomoyo kuwa hakuwahi kupata kusuhubiana na msichana mrembo na mwelevu kama alivyokuwa Vicky.

 

 Siku zote Simon alikuwa akijisifu kumuoa Vicky kwa kujiambia kuwa chaguo lake lilikuwa la maana. Alijiambia Vick ndiye mke wa maisha yake na kama atamuacha Vicky asingepata tena msichana wa aina hiyo.

 

Baaada ya dakika tano Vicky alirudi na kumwambia.

 

“Karibu mezani mume wangu”

 

“Asante mke wangu”

 

Simon alinyanyuka na kwenda mezani. Alikaa kwenye kiti na kujisogezea sahani. Vicky alikuwa amesimama kando ya meza akamtengea wali na vitakataka vingine kisha akamnawisha mikono.

 

“Karibu” Vicky akamwambia huku akiketi.

 

“Wewe umeshakula?”

 

“Mimi tayari”

 

Vicky alimzungumzisha Simon hadi alipomaliza kula akamnawisha mikono.

 

                                  ************

 

Saa tatu asubuhi ya siku iliyofuata, Simon alifika katika mkahawa wa Afrique. Alimkuta Dokta Kweka akinywa chai.

 

“Karibu” alimwambia.

 

Simon aliketi. Mhudumu alipomfuata, Dokta Kweka alimwambia.

 

“Msikilize”

 

“Naweza kukuhudumia” Mhudumu alimwambia Simon.

 

“Nipatie supu ya ng’ombe na chapatti mbili”

 

Mhudumu aliondoka. Simon akamtazama Kweka.

 

“Ndiyo Dokta, umepata habari gani?”

 

Dokta Kweka akatabasamu.

 

“Umefanya kazi nzuri, nimeshapata taarifa zote. Asante sana”

 

Simon akacheka.

 

“Jana nilipokwambia ulidhani ni mzaha”

 

“Nilijua haikuwa mzaha, nitakupatia pesa yako iliyobaki”

 

Supu ilipoletwa Simon alianza kula huku akiendelea kuzungumza na Kweka. Walipomaliza kula Dokta Kweka alifungua mkoba wake akampa Simon shilingi milioni mbili na nusu.

 

Simon alizitia mifukoni kisha akamuaga Kweka na kunyanyuka.

 

“Subiri” Kweka alimwambia.

 

Simon akainamia meza ili kumsikiliza Kweka.

 

“Ndiyo”

 

ITAENDELEA