HADITHI, ALIYEMUUA MCHUMBA WANGU SEHEMU YA 14

HADITHI

 

ALIYEMUUA MCHUMBA WANGU 14

 

ILIPOISHIA

 

“Ni kitu gani ambacho wewe hukubaliani nacho?’ Mwendesha mashitaka aliendelea kumuuliza.

 

“Sikubaliani kwamba mshitakiwa aliye mbele yangu ni muuaji”

 

“Ni nani?”

 

“Simtambui”

 

“Una maana kwamba yule uliyekwenda kumtambua kituo cha polisi mara tu alipokamatwa si yeye?”

 

“Si yeye”

 

“Utakuwa umemsahau?’

 

“Nina kumbukumbu timamu, si yeye!”

 

“Lakini unakubaliana kwamba aliyeuawa alikuwa mchumba wako?”

 

“Ndiyo alikuwa mchumba wangu”

 

“Sasa nikikwambia kwamba mshitakiwa aliye hapo ndiye yule uliyemthibitisha wewe mwenyewe mbele ya polisi kuwa alimuua mchumba wako, bado utakataa?’

 

James akatikisa kichwa.

 

“Nitakataa. Na ninasema kwamba mshitakiwa huyu simtambui, ni bora aachiwe tu”

 

“Unasema kweli James?”

 

“Kweli tupu. Hapa niliapishwa niseme ukweli”

 

“Sawa”

 

Mwendesha mashitaka akamtazama jaji.

 

“Mheshimiwa shahidi wangu amenikana” alimwambia.

 

SASA ENDELEA

 

“Amesema kwamba mshitakiwa aliyeko kwenye kizimba, siye aliyemuua mchumba wake” Jaji alimwambia na kuongeza “Nyinyi mnatakiwa mumlete muuaji halisi”

 

“Nimekuelewa mheshimiwa” Mwendesha Mashitaka alimjibu na kuketi kinyonge.

 

“Wakili wa mshitakiwa una maswali  yoyote ya kumuuliza shahidi?” Jaji akamuuliza wakili aliyewekwa na serikali kumtetea mshitakiwa.

 

Kwa mujibu wa sheria, mtu anayeshitakiwa kwa kosa la mauaji huwekewa wakili na serikali kama hana uwezo wa kuweka wakili.

 

“Ninayo maswali” Wakili huyo alijibu huku akiinuka.

 

“Uliza maswali yako”

 

Wakili alisimama na kumtazama James.

 

“Aliyeuawa alikuwa ni nani wako?” alimuuliza.

 

“Alikuwa mchumba wangu”

 

“Wewe ulishuhudia wakati marehemu anauawa?”

 

James akaeleza jinsi tukio zima lilivyotokea.

 

“Kwa hiyo ulimuona muuaji?’

 

“Ndiyo nilimuona”

 

“Wakati mshitakiwa anakamatwa uliitwa kwenda kumtambua?”

 

“Ndiyo niliitwa”

 

“Ulikwenda kumtambua?”

 

“Ndiyo nilikwenda”

 

“Alikuwa ndiye aliyemuua mchumba wako?”

 

“Alikuwa ndiye”

 

“Sasa hebu mtazame mshitakiwa aliyeko kizimbani”

 

James akamgeuzia macho mshitakiwa huyo.

 

“Ndiyo ninamtazama” akasema.

 

“Ndiye yeye aliyemuua mchumba wako?”

 

James akatikisa kichwa.   

 

“Hapana, siye”

 

“Je ndiye yeye uliyekwenda kumtambua kituo cha polisi?”

 

“Siye”

 

“Nini maoni yako, unadhani polisi wameleta mtu mwingine?”

 

“Naweza kusema hivyo”

 

“Kwa maoni yako mshitakiwa anastahili kuendelea kushitakiwa?’

 

“Hastahili, ni bora aachiwe tu”

 

“Sawa. Asante sana” Wakili alisema na kumtazama jaji.

 

“Mheshimiwa nimemaliza maswali yangu”

 

Aliposema hivyo alivuta kiti na kukaa huku akiona kazi yake imekuwa ndogo kuliko alivyotarajia.

 

Mwendesha mashitaka alikuwa amefadhaika. Hakujua jaji angekuwa na uamuzi gani kuhusu shahidi wao kuwakana na kuwa shahidi wa upande wa utetezi wakati ushahidi wake ndio uliokuwa ukitegemewa kumtia hatiani mshitakiwa.

 

Jaji baada ya kumaliza kuandika alimwambia James ashuke kizimbani, akamuuliza Mwendesha Mashitaka.

 

“Mna mashahidi wengine?”

 

Mwendesha Mashitaka akasimama.

 

“Tuna ushahidi wa vielelezo vya alama za vidole na picha zilizokutwa katika simu ya mshitakiwa zinazomuhusu marehemu”

 

“Shahidi wenu yuko tayari?’

 

“Yuko tayari”

 

“Aitwe”

 

Shahidi aliyeitwa alikuwa mpelelezaji wa ile kesi, Inspekta Amour.

 

Amour alianza kuukosoa ushahidi wa James kwamba haukuwa na ukweli kwani mshitakiwa aliyekuwa kizimabani alimtambua na kumthibitisha yeye kabla ya kufunguliwa mashitaka.

 

Wakili wa utetezi akasimama na kupinga maelezo ya Inspekta Amour.

 

“Inspekta wewe si mwendesha mashitaka, umekuja hapa kutoa ushahidi wa vielelezo. Toa ushahidi uliotakiwa kuutoa na si vinginevyo” alimwambia.

 

“Nilikuwa naeleza kuhusu shahidi aliyepita. Ushahidi wake haukuwa wa kweli” Amour alijitetea.

 

“Unaeleza kama nani?”

 

Wakili alimtolea macho.

 

“Kama shahidi wa upande wa serikali”

 

“Hapa tuko kisheria, hatuko kinyemela. Wewe hukupaswa kutoa maelezo hayo bali ni muendesha mashitaka wako”

 

“Sawa. Nimekuelewa”

 

Wakili akakaa.

 

Amour akaielezea mahakama kwamba alama za vidole za mshitakiwa zilikutwa kwenye kitasa cha mlango wa nyumba ya marehemu mara tu baada ya tukio hilo la mauaji. Kadhalika zilikutwa kwenye simu ya marehemu ambayo aliishika kabla ya kufanya mauaji.

 

Aliendelea kueleza kuwa mshitakiwa pia alikuwa amejirushia picha za marehemu zinazomuonesha akiwa na mchumba wake bila ridhaa ya marehemu. Akaeleza kuwa picha hizo zilizokutwa kwenye simu ya mshitakiwa zilitoka kwenye simu ya marehemu.

 

“Wewe kama mpelelezi wa hii kesi, kukuta picha za marehemu kwenye simu ya mshitakiwa na kupatikana kwa alama za vidole vya mshitakiwa kwenye simu ya marehemu na kwenye kitasa cha mlango wa nyumba yake kulikupa picha gani?” Mwendesha mashitaka alimuuliza Inspekta Amour.

 

ITAENDELEA