SHIDA YA MAJI MUHEZA YAPUNGUZA NGUVU KAZI YA KIPATO

Tangakumekuchablog

Muheza, WAKATI Mamlaka ya Maji safi na Maji taka Tanga (Tanga Uwasa) ikiwa katika maadhimisho ya wiki ya Maji, bado wakazi  wengi wanaendelea kuteseka kukosa huduma hiyo muhimu na kulazimika kufunga safari kufuata maji.

Wakazi wa vijiji vya Mkanyageni, Ngomeni na Kirapura Wilayani Muheza vinavyopakana na jiji la Tanga wamekuwa katika kero ambayo wamedai kuwa itakuwa ndoto katika maisha yao kupata maji safi na salama ya mabomba.

Wakizungumza kwa nyakati tofauti na Tangakumekuchablog mchana huu, wakazi hao walisema wamekuwa  wakiamka saa kumi za usiku kuwahi foleni kijiji cha Pongwe kilichoko jiji la Tanga ambapo dumu moja huuzwa shilingi mia tano.

Walisema maji hayo ambayo  hutegemewa na wakazi wengi wa Muheza wamekuwa wakiamka saa kumi za usiku ili kuwahi foleni na kukumbana na vikwazo vingi vikiwemo gharama za usafiri .

‘Kero hii ya shida ya maji katika Wilaya yetu ya Muheza imekuwa ya mazoea ambayo inatuumiza-----si usiku wala mchana muda wote tuko katika kusaka maji na kuacha kufanya kazi za kujiletea kipato” alisema Asha Mbaraka

“Maadhimisho haya ya wiki ya maji kwetu hayana faida yoyote kwetu zaidi ya kupigwa vijembe----naweza kuyaita ni wiki ya masimango” alisema Asha

Asha alisema kero hiyo ya maji imekuwa ikiwafanya kuwa katika mazingira hatarishi katika majumba yao baada ya matumizi ya maji kushindwa kukidhi na kutumia kwa tahadhari jambo ambalo linatishia magonjwa ya miripuko.

Kwa upande wake, mkazi wa Ngomeni moja, Rukia Abdalla, alisema kwa muda mrefu wamekuwa wakiiomba Serikali na mashirika ya misaada kuwachimbia kisima ili kupunguza kero lakini maombi yao yamekuwa yakiwekwa kapuni.

Alisema hali hiyo imekuwa ikirejesha nyuma jitihada za kujiletea maendeleo na nguvu kazi na akili zao kuziweka zaidi katika kusaka maji ambayo yanahitaji pesa kuweza kuyapata.

“Bila maji watoto hawawezi kwenda shule na kuwaandalia chai pamoja na chakula cha mchana wanaporejea-----hii inatufanya kupunguza kasi ya kujiletea maendeleo baada ya kushinda muda mwingi katika foleni za maji” alisema Rukia

Alisema ili kuweza kumaliza kero hiyo ni vyema mamlaka ya maji Tanga Uwasa kwa kushirikiana na Serikali kuweka nguvu za kusambaza maji mjini na vijijini na kudai kuwa ni aibu Wilaya ya Muheza kukosa maji wakati bwawa linalopeleka maji Tanga linatokea Muheza.

                                                  Mwisho

 Wakazi wa vijiji vya Mkanyageni, Ngomeni  na Kirapura Wilayani Muheza Mkoani Tanga wakiwa katika foleni  ya  maji kwa kuyafuata zaidi ya kilometa 20 baada ya maeneo yao kutokuwa na maji kwa miaka mingi.